भांगरभूंय | प्रतिनिधी
(आयज संवसारीक रक्तदान दीस. ते निमतान विशेश लेख)
आ यज 14 जून, आयचो दीस पुराय संवसारांत संवसारीक रक्तदान दीस म्हूण मनयतात. ऑस्ट्रेलियांतले डॉ. कार्ल लॅडस्टेनर ह्या संशोधकाचे यादी निमतान हो दीस संवसारीक रक्तदातो दीस म्हूण मनयतात. 14 जून हो तांचो जल्मदीस. डॉ. कार्ल लॅडस्टेनर हांणी ‘एबीओ’ हो नवो रक्तगट सोदून काडलो. तांच्या ह्या संशोधना खातीर तांकां नोबॅल पुरस्कार मेळिल्लो. पयलो संवसारीक रक्तदातो दीस 2005 वर्सा मनयिल्लो. उपरांत दर वर्सा हो दीस मनयतात. दरेक वर्सा एक सुत्र घेवन हो दीस मनयतात. मात सुरक्षा, रक्तदान श्रेश्ठ दान, डोनेट प्लेटलेट्स ह्या सारके सुत्र घेवन ताची म्हायती ह्या दिसा दितात. रक्तदानाचें आवाहन करतात. संवसारीक भलायकी संघटणेन जाहीर केल्ल्या ह्या दिसाच्या सादरीकरणांत रेड क्रॉस सोसायटीचो जातीनिशी वांटो आसता.
कौन्सील ऑफ युरोप ही संघटणा लेगीत रक्तदाना विशीं व्हड प्रमाणांत लोकजागृताय करता. आमच्या देशांत लेगीत विवीध सरकारी, समाजीक, सेवाभाव संस्था ह्या दिसाचें आयोजन करून लोकां मदीं रक्तदाना विशीं लोकजागृताय करतात. ह्या दिसा रक्तदात्यांचो भोवमान करतात. रक्तदान शिबिराचें आयोजन करतात. रक्तदान श्रेश्ठ दान अशें म्हणटात. कारण, ह्या दानाक लागून मनशाचो जीव वाटावता. सुरक्षीत रक्त ही हालींची वैश्वीक समस्या निर्माण जाल्या. दर वर्सा 9 कोटी युनिटा परस चड रक्तदान करतात. तरी लेगीत रगताची उणाव जाणवता. अपघातग्रस्त व्यक्ती, शस्त्रक्रिया जाल्ल्यो व्यक्ती, रगतांतली त्रुटी आशिल्ल्या व्याधीग्रस्त व्यक्ती, बाळंतपणांत जावपी आवयांचें मरण आनी कुपोशण, विवीध प्रकारचे बाल मृत्यू, धामीचें दुयेंस अशा वेळार रगताची खूब गरज पडटा.
कोरोना काळांत जाल्यार रगताचो कसो सुमारा भायर उणाव जाणवलो हें आमी पळयलांच. कोरोना काळांत रक्तदान शिबिरां बंद आशिल्ल्यान देशांत रक्तदानाचो व्हड प्रमाणांत उणाव जाणवल्लो. रगताच्या उणावाक लागून खुबश्यो शस्त्रक्रिया मुखार धुकलच्यो पडिल्ल्यो. प्रधानमंत्री आनी राज्यांच्या मुख्यमंत्र्यांनी लोकांक रक्तदान करचें अशें आवाहन केल्लें. फुडारांतूय रगताचो असो उणाव जावंक शकता. आमच्या रगताक लागून कोणाचो तरी जीव वाटावता. म्हणूनच रक्तदानाक सर्वश्रेश्ठ दान अशें म्हणटात.
रक्तदानाच्या रुपान आमी मनीसजातीक एक व्हड देणगी दितात. रक्तदान केल्ल्यान कसलीच दुखापत वा दुश्परिणाम जायना. मनशाच्या रगतांत पांच लिटर रगत आसता आनी रक्तदानांत फक्त 350 मिलि इतलेंच रगत घेतात. ताका लागून कसलीच कमजोरी जाणवना. विशेश म्हणल्यार 24 ते 48 वरांत जितलें रगत आमी दान दिलां तितलेंच तें परतून येता. ताका लागून दरेक मनशान मुखार येवन रक्तदान करूंक जाय. रक्तदान सर्वश्रेश्ठ दान अशें म्हणून प्रचार जायत आसलो तरी आमचे कडेन रक्तदात्यांची संख्या खुबूच उणी आसा. भारतांत फक्त 0.6 टक्केच लोक रक्तदान करीत आसतात. 140 कोटी लोकसंख्येच्या देशांत हें प्रमाण खूब उणें आसा. ताका लागून देशांत रगताचो खुबूच उणाव भासता. तातूंत कोरोना सारक्या म्हामारींत जाल्यार सुमारा भायर परिस्थिती निर्माण जाता. अपघातांतले दुयेंती, बाळंतपणांतलो काळ, अतिदक्षताय विभाग, ताकतिकेची शस्त्रक्रिया अशा वेळार रगताची गरज निर्माण जाता. जर दुयेंतीक वेळारूच रगत मेळ्ळें ना जाल्यार ताका मरण लेगीत येवंक शकता. ताका लागून दरेकान सादूर रावंक जाय. आमी दान केल्ल्या रगताक लागून कोणाचो तरी जीव वाटावता. हे खातीर दरेकल्यान रक्तदान करूंक जाय. रक्तदान म्हणल्यार जिवदान, रक्तदान म्हणल्यार एक बरें दान हें लक्षांत घेवन दरेकान रक्तदान करूंक जाय.
श्याम ठाणेदार
99222546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
