शेतांक फावोसो पावस

भांगरभूंय | प्रतिनिधी

शेतांतल्या कामांक सुरवात

भांगरभूंय । प्रतिनिधी

पणजी : सेगीत पडपी पावसाक लागून गोंयांत शेतीच्या कामांक सुरवात जाल्या. तिसवाडी, बार्देस सयत हेर म्हालांत तरवो काडपा सयत शेतकारांनी शेतां नांगरपाक सुरवात केल्या, अशी म्हायती शेतकी संचालक संदीप फळदेसाय हांणी दिली.

गोंयांत सर्द आनी वायंगण अशीं दोन तरांची शेती जाता. वायंगण शेती परस सर्द शेतीचें प्रमाण चड आसा. चडशे शेतकार परंपरीक पद्दतीन शेती करतात. पावस पडले उपरांत शेतां नांगरतात. शेतांत उदक भरले उपरांत नांगरणी सोंपी जाता. पावसा पयलींच कांय जाणांनी शेतां नांगरपाक सुरवात केल्ली. तांणी आतां ओँपपाक सुरवात केल्या. पावसाची सुरवात बरी जाल्या. शेती खातीर ही खोशयेची खबर आसा, अशें शेतकी संचालक संदीप फळदेसाय हांणी सांगलें.

बीं ओंपून ते तरवो काडटात. तरवो वयर सरले उपरांत तो काडून लायतात. जून सोंपपाक तरवो लायतात. गोंयांतले चडशे शेतकार हे ल्हान शेतकार आसात. तांची जमीन 5 ते 10 एकरा मदीं आसा. हाका लागून यंत्रीक शेती परस परंपरीक शेती करप तांकां शक्य जाता, अशें शेतकी संचालकान सांगलें. जांची हॅक्टरांनी जमीन आसता ते ट्रॅक्टर वा यंत्रीक पद्दतीन शेती कसतात. सेंद्रीय शेतीचो प्रयोग गोंयांत सुरू जाला आसलो तरी ताचें प्रमाण सामकें उणें आसा. किडी तशेंच रोगा सावन जतनाय घेवपा खातीर शेतकारांक युरिया तशेंच हेर साऱ्यांचो वापर करचोच पडटा, अशी म्हायती शेतकी खात्याच्या अधिकाऱ्यान दिली. पावस पडत रावलो जाल्यार खाजन तशेंच सखल वाठारांत उदक सांचून उरता. हाका लागून तरवो कुसपाची भिरांत आसता. हाका लागून शेताक पावस गरजेचो आसलो तरी ताणें विसव घेवप गरजेचें आसता, अशें तांणी सांगलें.

पावसाक नेट

फाटले कांय दीस मॉन्सूनच्या पावसाचो नेट उणो आशिल्लो. बिरेस्तारा राती आनी शुक्रारा फांतोडेर गोंयाक पावसान झोड दिलो. गोंयांत शुक्रारा सकाळीं 8.30 मेरेन 4 इंच पावसाची नोंद जाली.

फोंड्यां सगल्यांत चड 8.69 इंच पावसाची नोंद जाली. पावसाक लागून कांय वाठारांनी पडझड जावन लुकसाणेच्या घडणुकांची नोंद जाली. हवामान खात्यान गोंयांत 14 ते 16 जून मेरेन उटंगाराच्या पावसाची शक्यताय उक्तायल्या. ते प्रमाण ह्या तीन दिसां खातीर पावसाचो ऑरेंज अरल्ट जारी केला.

गोंयांत 17 ते 19 जून मेरेन मध्यम स्वरुपाच्या पावसाची शक्यताय आसा. ह्या तीन दिसां खातीर यलो अलर्ट घोशीत केला. पावसाक लागून गोंयांतलें चडांत चड तापमान देंवलां. शुक्रारा पणजे चडांत चड 27.5 अंश जाल्यार उण्यांत उणें 23.5 अंश सेल्सियस तापमानाची नोंद जाली. मुरगांवां चडांत चड 32.4 अंश आनी उण्यांत उणें 24 अंश सेल्सियस तापमान आशिल्लें. फुडले स दीस गोंयांत चडांत चड 28 अंश जाल्यार उण्यांत उणें 25 अंश सेल्सियस मेरेन तापमान आसपाची शक्यताय आसा.

गोंयांत 24 वरांत धारबांदोड्यां 6.66 इंच, सांग्यार 5.64 इंच, काणकोणां 5.51 इंच, केप्यां 3.97 इंच, म्हापश्यां 3.85  पेडण्यां 3.57 इंच, पणजे 3.56 इंच, पोरणें गोंया 3.37 इंच, दाबोळे 3.33 इंच, मडगांवां 3.15 इंच, मुरगांवां 2.23 इंच, जाल्यार सांखळे 1.44 इंच पावसाची नोंद जाली.

अंदूं गोंयांत मॉन्सून 25 मेक पाविल्लो, मात जूनांत पावसाचो नेट उणो जाल्लो. फुडल्या कांय दिसांत पावसाचो नेट वाडपाची शक्यताय आसा.

पोरूं परस अर्दो पावस

अंदूं गोंयांत 1 ते 13 जून मेरेन सरासरी 9.54 इंच पावसाची नोंद जाल्या. पोरूं 1 ते 13 जून ह्या काळांत सरासरी 18.28 इंच पावसाची नोंद जाल्ली. पोरूंचे तुळेंत अंदूं जूनांत पावसाचें प्रमाण अर्द्यान उणें जालां.