भांगरभूंय | प्रतिनिधी
जोयडा, खबरां संस्थाः जिल्लो प्रशासनान जोयडा म्हालांतल्या गणेशगुडी हांगच्या काली न्हंयचेर १ जून ते ३० सप्टेंबर मेरेन अश्या ४ म्हयन्यां खातीर उदका खेळांचो उपक्रम स्थगीत केला. ताचो परिणाम थळाव्या पर्यटन वेवसायाचेर जाल्ल्यान जिल्लोधिकार्याच्या निर्णयाचेर वेवसायिकांनी असमाधान उक्तायलां.
गणेशगुडी ते डंडेली मेरेन काळी न्हंयेंतल्या जायत्या सुवातींनी राफ्टिंग, कयाकिंग, जाकोजीबात, बोटिंग अशे जायते उदकांतले खेळ जातात. ही न्हंय उदकांतल्या खेळां खातीर फामाद आशिल्ल्यान देशभरांतल्यान आनी परदेशांतल्यान पर्यटक उदकांत राफ्टिंग करपाखा तीर हांगा येतात. हाका लागून हांगचे रिसॉर्ट्स, होम स्टे आनी हेर पर्यटन वेवसायूय चलतात. पूण जिल्लो पर्यटन उदरगत समितीचो अध्यक्ष आशिल्ल्या जिल्लोधिकार्यानींच १ जून ते ३० सप्टेंबर मेरेन ४ म्हयन्यां खातीर उदकांतले खेळ बंद करपाचो आदेश दिला आनी ताका लागून हांगचे वेवसायीक संकश्टांत पडल्यात.
उदकाच्या सांठ्यांत उणावाक लागून भंय ना
मुर्डेश्वर, होन्नावर, गोकर्णच्या दर्या आनी न्हंयांच्या देगांचेर जावपी उदकांतले खेळ आनी काळे न्हंयेचेर जावपी उदकांतले खेळ वेगळे आसात. काळी न्हंय सुपा धरणाच्या सकयले वटेन आशिल्ल्यान आजूनय व्हडा प्रमाणांत पावस झडूंक नाशिल्ल्यान हे न्हंयेक हुंवाराचो धोको ना. धरणांच्या उदका सांठ्यात बरोच उणाव जाला. हाका लागून काळी न्हंयेचेर उदकांतले खेळ सुरू दवरपाक कसलीच आडखळ ना अशें पर्यटक वेवसायीक म्हणटात. हाका लागून जिल्लोधिकार्यान जारी केल्ल्या आदेशाविशीं परत विचार करचो आनी उदकाच्या खेळांक परवानगी दिवची, अशी मागणी पर्यटन वेवसायिकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
