भांगरभूंय | प्रतिनिधी
दरा सयत टॅक्सी वेवसायाचेर नियंत्रण दवरपाक मार्गदर्शक तत्वां तयार
पणजी : टॅक्सी भाड्याच्या दरांत समानता हाडपा वांगडा वेवसायाचेर नियंत्रण दवरपा खातीर ऍप ऍग्रीगेटर मार्गदर्शक तत्वांचो मसुदो तयार केला. हाचे फाटलो हेत ओला, उबर वा हेर राज्यांतल्यान ऍग्रीगेटर हाडपाचो ना. आमदार, टॅक्सी वेवसायीक, हॉटेल वेवसायिकां सयत सगल्यांक विस्वासांत घेवन ऍप ऍग्रीगेटर मार्गदर्शक तत्वांचेर उपाय काडटले, अशें मुख्यमंत्री डॉ. प्रमोद सावंत हांणी म्हणलें.
मांद्रेंचे आमदार जीत आरोलकार, कळंगुटेचे आमदार मायकल लोबो आनी कांय टॅक्सीवाल्यांनी मुख्यमंत्री डॉ. प्रमोद सावंत हांची ऍप ऍग्रीगेटर प्रस्नाचेर भेट घेवन चर्चा केली. हे चर्चे उपरांत मुख्यमंत्री डॉ. प्रमोद सावंत हांणी ही म्हायती दिली. ओला, उबर वा हेर राज्यांतल्या ऍग्रीगेटरांक राज्यांत थारो दिवचे ना. तरी पर्यटक आनी हेरांक परवडपा सारकें भाड्याचें दर आसपाक जाय. तशेंच दरांनी समानता हाडपा खातीर मार्गदर्शक तत्वांची गरज आसा, अशें मुख्यमंत्री डॉ. प्रमोद सावंत हांणी म्हणलें.
ऍप ऍग्रीगेटर मार्गदर्शक तत्वांचो प्रस्तावीत मसुदो स्थगीत दवरपाची गरज आसा. सरकारान टॅक्सी सेवेचें दरपत्रक सगल्यांक विस्वासांत घेवन निश्चीत करचें. हेर राज्यांतल्या ऍप ऍग्रीगेटरांक आमचो विरोध आसा, अशें बसके उपरांत आमदार मायकल लोबो हांणी म्हणलें.
हेर राज्यांतल्या ऍग्रीगेटरांक विरोध आशिल्ल्याचें आमदार जीत आरोलकार हांणीय सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
