भांगरभूंय | प्रतिनिधी
पणजी: रानां हक्क कायदो २००६ चे तजवीजे खाला केल्ले प्रलंबीत दावे फास्टट्रॅक पद्दतीन निकालांत काडपा खातीर दक्षीण गोंय जिल्हाधिकारी कार्यालयान प्रकल्प अधिकारा खाला १४ जून २०२५ दिसा काणकोण, धारबांदोड्यां, केपें, सांगें आनी फोंडें म्हालांत म्हाल पांवड्यार शिबीरां आयोजीत केल्यांत.
उपजिल्हाधिकारी कार्यालय, गट विकास अधिकारी, जोड मामलेदार, ग्रामपंचायत सचीव, आदिवासी कल्याण संचालनालय आनी रानां खात्याच्या समन्वयान हीं शिबीरां आयोजीत केल्यांत.
रानां हक्क दावे प्रलंबीत आशिल्ल्या दावेदारांनी आदिवासी दाखलो, स्वताचो जाहिरनामो, फॉर्म-ए, जाण्ट्या मनशाचें निवेदन वा १३ डिसेंबर २००५ पयलीं सावन जमनींत लागवड केल्ल्याचो पुरावो आनी हेर गरजेच्या दाखल्यां सयत शिबीराक हजर रावचें. काणकोणां सरकारी हायर सेकंडरी स्कुल, चावडी, धारबांदोड्यां उपजिल्हाधिकारी कार्यालय, धारबांदोड्यां, सांग्यार नगरपालिका सभाघर, केपें पंचायत सभाघर, बार्शे आनी फोंड्यां उपजिल्हाधिकारी कार्यालयांत शिबीर जातलें.
तशेंच दिल्ले दावे निकालांत काडपा खातीर संबंदीत गांवांनी शेनवार २१ जून २०२५ दिसा विशेश ग्रामसभांचें आयोजन केलें. राज्य सरकारान सगले प्रलंबीत रान हक्क दावे १९ डिसेंबर २०२५ मेरेन निकालांत काडपाचें थारायलां. रान हक्क दावेदारांनी कसलीय मजत जाय आसल्यार संबंदीत रानां हक्क समिती वा जोड मामलेदार-१ च्या कार्यालयांत संपर्क करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
