भांगरभूंय | प्रतिनिधी
जोयडा: कारवारच्या अंकोलाक वचपी महामार्गांवेल्या एका बोगद्याच्या तोंडारूच पालसणां कोसळिल्ल्यान हो मार्ग येरादारी खातीर बंद केला. हाका लागून दुसरे वटेनच्या बोगद्या वेल्यान येरादारी सुरू केल्या.
कारवार शारांत सध्या सुरू आशिल्ल्या पावसाच्या नेटाक लागून सगले कडेन उदकूच उदक जाला. हाका लागून लोकजीण विस्कळीत जाल्या. घोग्यांनी पडिल्ल्या पावसाक लागून काल रातच्यान राष्ट्रीय महामार्ग ६६ (एनएच ६६) चेर कारवार लागसारच्या बोगद्याच्या दोंगरावेली माती, फातर, उदक मागारचेर येवपाक लागिल्लें. रातभर पावस झडिल्ल्यान बोगद्याच्या मार्गाच्या तोंडारूच पालसणां कोसळ्ळीं. थळाव्या लोकांनी हे विशीं म्हायती दितांच येरादारी पुलीस आनी आयआरबी अधिकार्यांनी घडणुके सुवातेर वचून हो मार्ग रोखडोच येरादारी खातीर बंद केला.
आयआरबी कंपनीच्या अधिकार्यां कडल्यान हें फातर आनी माती काडपाचें काम सुरू आसा. मात पावसाक लागून माती आनी फातर, तशेंच कोयराचें उदक दोंगरावेल्यान व्हांवून आयिल्ल्यान माती काडपाक आडमेळीं येतात. एक बोगद्याचो मार्ग बंद जाल्ल्यान दुसर्या बोगदो मार्गाच्या दोनूय वटेन येरादारी सुरू केली. फाटल्या वर्साय हेच सुवातेर पालसणां कोसळिल्ल्यान कांय दीस मार्ग येरादारीक बंद दवरिल्लो. आता राष्ट्रीय महामार्ग प्राधिकरणान बोगद्याच्या मार्गाचो फिटनेस अहवाल दिले उपरांत हो बोगदो मार्ग येरादारी खातीर सुरू करतले अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
