भांगरभूंय | प्रतिनिधी
केपें: गुड्डेमळ सांवड्डेंचो समीर शेख (३२) ह्या तरणाट्याक ताच्या इश्टान गाझियाबाद उत्तरप्रदेशांत आपोवन खून केल्ल्याची घडणूक घडल्या. समीराचो खून जाल्ल्यान ताच्या कुटुंबाक आनी गांवच्या लोकांक बरोच व्हड धक्को बसला. आयज ताची कूड गुड्डेमळ हांगा हाडली. सध्या ह्या खून प्रकरणांत उत्तर प्रदेश पुलिसांनी दोगांक अटक केल्ल्यान आनीक दोगांचो पुलीस सोद घेतात.
मेळिल्ले म्हायती प्रमाण, समीर शेख हो तरणाटो पुण्याक एके बिगर सरकारी संस्थे खातीर काम करतालो. ता. २५ मेक ईद आशिल्ल्यान तो आपल्या घरा आयिल्लो. ता.३० मेक ताका ताच्या एका इश्टान ई-मेल करून दिल्लीक आपयिल्लो. ते प्रमाण तो आपल्या कुटुंबियांक सांगून विमानान दिल्लीक गेलो. मात दिल्लीक पावले उपरांत तीन दीस ताचो फोन बंद मेळटालो. उपरांत ३ तारखेर ताच्या कुटुंबियांनी कुडचडें पुलीस स्टेशनांत समीर बेपत्ता आशिल्ल्याची कागाळ दाखल केल्ली.
कुडचडें पुलीस स्टेशनाचे पुलीस निरीक्षक दीतेंद्र नायक हांणी हें प्रकरण दिल्लीचें हें खबर आसून लेगीत हाचो सोद लावपा खातीर पुलीस उप निरीक्षक गौतम शेटकार, पुलीस कॉन्स्टेबल अभिनव चव्हाण तशेंच गुड्डेमळ हांगच्या रोनी हांकां दिल्लीक धाडले.
शेटकार हांणी समिराचो सोद घेवपाक सुरवात केली. समीरान दिल्लीक रॅपिडो टॅक्सी बुक केल्ली. तेच म्हायतीच्या आदाराचेर पुलिसांनी रॅपिडो कार्यालयांत वचून समीर हाची म्हायती मेळयली. उपरांत टॅक्सी चालकान तांकां आपणें गाझियाबाद उत्तर प्रदेशांत समिराक खंयचे सुवातेर सोडिल्लो हें सांगलें. उपरांत समीरा वांगडा कोण आशिल्ले हाचो तपास सुरू केला तेन्ना समिरान चार आरोपीं मदल्या एकल्याक यु पी आय वरवीं पयशे धाडिल्ले अशी म्हायती मेळ्ळी. पुलिसांनी ते बँकेंत वचून कोणाच्या खात्याचेर पयशे धाडिल्ले ताचें नांव आनी मोबायल नंबर घेतलो. उपरांत त्या आरोपीचो पुराय रातभर सोद घेवन सकाळीं ताका अटक करपाक पुलिसांक येस आयलें.
पुलिसांनी अटक केल्ल्या दुबावितान सांगलें, आमी समिराक वळखनाशिल्ले. मात आमचो एक इश्ट आशिल्लो तांणीच ताका गाझियाबाद आपयिल्लो.
१० तारखेर दनपरां पुलिसांनी ह्या आरोपीक वांगडा घेवन, सगळे खंयच्या रुमांत राविल्ले त्या रुमाचो सोद घेतलो. हो रूम भायल्यान बंद आशिल्लो. उपरांत त्या रुमाच्या धनयाक आपोवन, कुलूप तोडून रुमांत प्रवेश केलो. तेन्ना रुमांत कांयच दिसूंक ना. मात जनेलांतल्या किडे भितर सरून ते बाथरुमांत वतात तें दिसलें. बाथरुमाक भायल्यान कुलूप लायिल्लें. तें तोडले उपरांत भितर कोणाक वास येवचो न्हय म्हणून खुबश्या चादरांनी आनी शेदरेन गुठलायिल्ली समिराची कूड पुलिसांक दिली. ह्या खुनाक धा दीस जावन गेल्ल्यान समिराची कूड कुशिल्ली आनी ती वळखुपाचे परिस्थितींत नाशिल्ली. उत्तर प्रदेश पुलिसांनी घडणुकेचो पंचनामो करून ताची कडू पोस्टमार्टमाक धाडले उपरांत ताची कूड ताच्या कुटुंबाचे सुवादीन केली.
समीर शेख हांच्या खुनाचो सोद घेवपा खातीर दक्षीण गोंयचे पुलीस अधीक्षक टिकम सिंग हांच्या मार्गदर्शना खाला कुडचडें पुलीस स्टेशनाचे पुलीस उप निरीक्षक गौतम शेटकार हांणी म्हत्वाची भुमिका केली. ताची सगल्याक तोखणाय जाता. फुडलो तपास खोरा (गाझियाबाद, उत्तर प्रदेश)पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
