भांगरभूंय | प्रतिनिधी
१६९ प्रवासी भारतीय, ५३ ब्रिटिश, १ कॅनेडियन आनी ७ पोर्तुगीज नागरिकांचो आसपाव
अहमदाबाद, खबरां संस्था: गुजरातच्या अहमदाबादांत एक व्हड विमान अपघात घडलो. हें प्रवासी विमान अहमदाबादच्या मेघानीनगर वाठारांत कोसळ्ळें. ह्या विमानांत २४२ प्रवासी आनी कर्मचारी आशिल्ले. प्रवाशां मदीं १६९ प्रवासी भारतीय, ५३ ब्रिटिश, १ कॅनेडियन आनी ७ पोर्तुगीज नागरिकांचो आसपाव आसा.
एअर इंडियाच्या ह्या विमानान अहमदाबादच्यान लंडनाक उड्डाण केल्ली. मात दनपरां १.३१ वरांचेर केल्ल्या उड्डाणा उपरांत वट्ट कांय मिनटांनीच विमान सकयल कोसळ्ळें.
मजगतीं, विमानांतल्या प्रवाशांची म्हायती मेळपा खातीर एअर इंडियान १८०० ५६९१ ४४४ हो हेल्पलायन नंबर सुरू केला.
हे घडणुके उपरांत कांय वेळांतूच ३ उजो पालोवपी गाडयो घडणुके सुवातेर दाखल जाल्यो. सध्या, एनडीआरएफचे पंगड आनी प्रशासना कडल्यान रेस्न्यू ऑपरेशन सुरू आसा. विमानांतल्या प्रवाशांची चडशी म्हायती उपलब्ध जावंक ना. मात ह्या विमानांतल्यान गुजरातचे आदले मुख्यमंत्री विजय रुपाणी हेय प्रवास करताले, अशी म्हायती आसा. विमान घडणुके उपरांत गृहमंत्री अमित शाह हांणी गुजरातच्या मुख्यमंत्र्यांक फोन करून म्हायती घेतली.
गुजरातांतल्या अहमदाबादांत एअर इंडियाच्या विमानाचो अपघात जाल्ल्यान सुमार ७०० फुटांवेल्यान मेघानीनगर हे वस्तींत हें विमान कोसळ्ळें. अपघाताची म्हायती मेळटांच थळाव्यांनी आनी प्रशासनान घडणुके सुवातेर धांव घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
