भांगरभूंय | प्रतिनिधी
काणकोण: पैंगीण पंचायतीच्या मार्ली प्रभागांत फाटल्या तीन वेंचणुकांनी अनुसुचीतजाती जमाती खातीर राखीव दवरल्याे. हे खातीर हेर मागास वर्गीय आनी सर्व सामान्य गटांतल्या उमेदवाराचेर अन्याय जाला. हें कारण मुखार करून, काळशी, चिपळे वाठारांतल्या मतदारांनी येता ते पंचायत वेंचणुकेंत तशेंच हाचे मुखार येवपी वेंचणुकांनी मतदान न करपाचो निर्णय घेतला अशी म्हायती काळशीचे गोसावी हांणी दिली.
पैंगीण पंचायतींतल्या मार्ली तिर्वाळ आनी प्रभागांत चिपळे, काळशी हे भाग येतात. हाचे पयलीं ह्या प्रभागांतल्यान जाकी आफोंस, दुमींग मोंतेरो, सुरेंद्र गोसावी, कुष्टा गांवकार, रामदास पुजारी, जगदीश गांवकार हे पंच वेंचून आयिल्ले.
ह्या प्रभागांत वट्ट 614 मतदार आसात. तातूंत हेर मागास वर्गियांची संख्या 114 जाल्यार अनुसुचीत जाती जमातींतल्या मतदारांची संख्या 348 इतली आसा.
पूण फाटल्या तीन वेंचणुकांनी हो प्रभाग फक्त अनुसुचीत जाती जमातीच्या उमेदवारा खातीर राखीव दवरून सर्वसामान्य गट आनी हेर मागास वर्गियांचेर अन्याय केल्ल्याचो आरोप थळाव्या लोकांनी केला. हाका लागून निरशेल्ल्या चिपळे, काळशी ह्या वाठारांतल्या मतदारांनी बहिश्कार घालपाचो निर्णय घेतला.
मजगतीं, काणकोणचे निर्वाचन अधिकारी मनोज कोरगांवकार ह्या वाड्या वयल्या लोकांचे म्हणणें आयकून घेवपाचे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
