धूम्रपानाक लागून ब्रेन ट्यूमराचो धोको वाडटा

भांगरभूंय | प्रतिनिधी

नवी दिल्ली, खबरां संस्था ः संवसारभरांतल्या कॅन्सर दुयेंतींचो डेटाबेस सांबाळपी ‘ग्लोबोकॅन’ ह्या वेब-प्लॅटफॉर्माच्या मतान संवसारभर दर वर्सा 3 लाखां परस चड ब्रेन ट्यूमरचे दुयेंती मेळटात. भारतांत दर वर्सा सुमार 40 हजार दुयेंती नोंद जातात.
धूम्रपान केल्यार जायत्या दुयेंसांचो धोको वाडटा, तातूंत मुखेल दुयेंस म्हळ्यार ब्रेन ट्यूमर. तंबाखूच्या धुंवरांतल्या कार्सिनोजेन्सांक लागून डीएनएचें लुकसाण जाता आनी ताका लागून कुडींत असामान्य पेशी वाडटात. धूम्रपान केल्यार मेंदवाची राखण करपी ‘ब्लड-ब्रेन बॅरिअर’ दुबळो जावंक शकता. हाका लागून हानीकारक पदार्थ मेंदवा मेरेन सोंपेंपणान पावतात आनी ब्रेन ट्यूमरचो धोको वाडटा.
‘ग्लोबल अॅक्शन टू एंड स्मोकिंग’ ह्या संशोधना प्रमाण, भारतांत 15 वर्सां आनी ताचे वयर पिरायेचे 25.3 कोटी लोक धूम्रपान करतात. तातूंत सुमार 20 कोटी दादले आनी 5.3 कोटी बायलो आसात. संवसारांत सगळ्यांत चड तंबाखूचे सेवन करपी देशांच्या वळेरेंत भारत चीना उपरांत दुसरे सुवातेर आसा. अशे परिस्थितींत भारतांतल्या लोकांमदीं ब्रेन ट्यूमरचो धोको चड आसा.

ब्रेन ट्यूमर म्हणल्यार कितें?

मेंदवांतल्यो पेशी अनियंत्रीत आनी असामान्य पद्दतीन वाडत जाल्यार एक गाठ तयार जाता. हाका ब्रेन ट्यूमर अशें म्हण्टात. ही गाठ दोन प्रकारची आसूं येता एक कर्करोगजन्य आनी कर्करोगरहित. मेंदवांतले फकत सुमार एक तृतीयांश गाठी कर्करोगजन्य आसतात. जेन्ना ही गाठ वाडटा तेन्ना तो मेंदवाच्या हेर भागांचेर दबाव घालपाक लागता. हाका लागून त्या भागांच्या कार्याचेर परिणाम जावं येता. पूण सगळ्योच गाठी धोक्याचे नासतात.

ब्रेन ट्यूमराची लक्षणां…

ब्रेन ट्यूमराची लक्षणां मेंदवांत खंय आसा आनी तो कितलो व्हड आसा हाचेर आदारून आसतात.
० तकली दुखप, खास करुन सकाळीं वा रातच्या वेळार न्हिदतना चड दुखप.
० कुडींत अटकीत झटके जाणवप.
० गजालीं विसरप, उसरां समजप वा उलोवपाक आडखळ येवप.
० मूड बदलप.
० अशक्तपणा म्हळ्यार कुडींच्या कांय भागांत ताकद नासप.
० चलतना आडखळप वा घुंवळ येवप, ओंकारी जावप.
० पळोवपाक वा आयकूपाक कमी येवप.

ब्रेन ट्यूमराचो धोको टाळपा खातीर…

० धूम्रपान करुं नाकात.
० निरोगी आहार, नेमान व्यायाम करप.
० खंयच्याय गजालीचो ताण घेवचो न्हय.
० दर दिसा सात वरां तरी न्हिद घेवप गरजेची.