भांगरभूंय | प्रतिनिधी
पणजीः गोंयांत गांवगिऱ्या वाठारांत पर्यटनाक चालना दिवपा खातीर गोंय पर्यटन उदरगत म्हामंडळ आनी गोंय रानां उदरगत म्हामंडळ हांचे बरोबर काम करतले. पर्यटकांचे सुरक्षे खातीर नवे प्रतिबंध घालप आनी पर्यटनां खातीर कांय घसघशांची वळेरी तयार करपाचेर भर दोनूय खात्याचे संचालक दितले, अशी म्हायती पर्यटन मंत्री रोहन खंवटे हांणी दिली.
गोंयच्या दर्या पलतडी गोंयची रानां, घसघशे आनी गांवगिऱ्या वाठारांतल्या पर्यटनाचेर भर दिवपा खातीर पर्यटन खातें आनी गोंय रानां उदरगत म्हामंडळ हांची पर्यटन भवनांत जोड बसका जाली. दर्या पलतडी गोंय हे संकल्पने खाला गांवगिरे वाठार, सैम, भलायकी आनी साहसी पर्यटनाक चालना दिवपा खातीर दोनूय खात्या भितर सहकार्या विशीं चर्चा जाली.
हे बसकेंत पर्यटन मंत्री रोहन खंवटे आनी गोंय रानां उदरगत म्हामंडळाची अध्यक्ष देविया राणे हांचे वांगडा पर्यटन संचालक केदार नायक, जीटीडीसीचे वेवस्थापकी संचालक कुलदीप आरोलकार, रानां उदरगत म्हामंडळाचे वेवस्थापकी संचालक नंदकुमार परब आनी हेर अधिकारी हाजीर आशिल्ले.
पर्यटन खातें आनी रानां खातें एकमतान काम केल्यार, उच्च दर्जाचें, शाश्वत पर्यटनाचे अणभव तयार करपाची एक व्हडली संद मुखार आसा. हो सहकार्य पर्यावरण पर्यटन आनी सैमाचेर आदारिल्ल्या अणभवांक एक नकासो म्हणून काम करपाक शकता, जाका लागून थळावे आनी पर्यटकांक दोगांकय लाव मेळटलो, अशें खंवटे हांणी सांगलें.
गोंयच्या गांवगिऱ्या वाठारांतलो सैम, भलायकी, साहस आनी सांस्कृतीक अणभवांक चालना दिवन पर्यटन मळार विविधताय हाडपाची सरकाराची वचनबद्धताय ह्या उपक्रमांतल्यान दिसून येता.
गांवगिऱ्या वाठारांत आशिल्ले घसघशे, रानजीव अभयारण्यां, रानां दायज आनी इको-ट्रेल हांचे कडेन लक्ष वळोपा खातीर आमी काम करीत आसा, अशें देविया राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
