भांगरभूंय | प्रतिनिधी
फोंडें: केंद्रांतलें प्रधानमंत्री नरेंद्र मोदीचें सरकार अंत्योदय तत्वाचेर काम करीत आसा. गरिबांतल्या गरिबाचो उद्धार जावचे खातीर जायत्यो येवजण्यो तांणी सुरू केल्यात. केंद्राची दरेक येवजण राज्य सरकारा वरवीं गांवांगांवांनी पावपाक लागल्या. ह्या केंद्र सरकारच्यो लोककल्याण आनी उद्धाराच्यो कार्यावळी ८०% राबोवपाचें काम गोंय सरकारान केलां. गोंय हें हे संबंदीचें पयलें राज्य आसपाक शकता. ह्यान फुडेंय केंद्राच्यो सगल्यो येवजण्यो प्रभावीपणान गोंयांत राबयतल्यो, अशें मुख्यमंत्री डॉ. प्रमोद सावंत हांणी सांगलें.
प्रधानमंत्री नरेंद्र मोदी हांच्या केंद्रांतल्या सरकाराक इकरा वर्सां पराय जाल्ल्याचे फाटभूंयेर हांगा आयोजीत केल्ले ‘संकल्प से सिद्धी’ हे कार्यावळीं ते उलयताले. ह्या वेळार माचयेर केंद्रीय मंत्री श्रीपाद नायक, मंत्री सुभाष शिरोडकार, रवी नायक, सभापती रमेश तवडकार, मंत्री रोहन खंवटे, गोविंद गावडे, निळकंठ हळर्णकार, बाबुश मोन्सेरात, सुभाष फळदेसाय, खासदार सदानंद तानावडे, गटाध्यक्ष आनंद नायक आनी हेर मानेस्त हजर आशिल्ले.
आमचें सरकार शेतकारांचें सरकार. हाका लागून शेतकारांक कितें जाय, नाका तें आमी पळयतात. तशेंच आदिवासी भावांक तांच्या हक्काच्यो जमनी दिवपा खातीर रान हक्क कायदो २००६ आमी राबयतात. ह्या कायद्या खाला आमचे कडेन धा हजार दावे नोंद जाल्ले. हातुंतले २००० दावे निकालांत काडल्यात. हेर आठ हजार लोकांक १९ डिसेंबर २०२५ पयलीं सनदी दितले अशें डाॅ. सावंत हांणी सांगलें.
आदल्या सरकारान फकत स्वताचो स्वार्थ पळयलो, तांणी शेतकारां खातीर कितें केलां तें सांगचें. मात आयज आमी वेगवेगळ्या बँकां वरवीं शेतकारां खातीर जायत्यो येवजण्यो चालीक लायल्यात. शेतकारांक मेळपी अनुदानांत व्हड प्रमाणांत वाड जाल्या. हाचे पयलीं शेतकार रिणांत आशिल्ले. आयज शेतकार आत्मनिर्भर जाल्यात. आयज शेतकारांक आपली जमीन घाणाक घालिनासतना रीण घेवंक मेळटा. आमी शेतकारांक इतले सशक्त केल्यात. वेगवेगळ्या सुवातांचेर गोशाळो सुरू जावच्यो अशें आमचें मत. कारण ह्या प्रदेशाक गोप्रदेश ह्या नांवान वळखतात. सगल्यांनी मायेंच्या शिकेरी गोशाळेक सगल्यांनी भेट दिवची. थंय जावपी निस्वार्थी कामांचो अभ्यास करात. फुडाराकय आमी खूब मजत करतले अशें तांणी सांगलें.
वानरमारे समाज इतले दीस उपेक्षीत आशिल्ले. त्या समाजाक मुखेल प्रवाहांत हाडपाचें काम फकत आमच्या सरकारान केलां. हेर सरकारान फकत उलोवन दाखयलें. मनीस म्हणून जगपा खातीर ज्यो सुविधायो आसतात त्यो तांकां आयज मेळटात. समाज कल्याण मंत्रालयान हें बरें काम केलां, अशें मुख्यमंत्र्यान मुखार म्हणलें.
कलाकारांकय आमी फावो तो मान दित आयल्यात. कलाकारांची पेन्शन वाडयल्या. आमी फकत मतां खातीर वावुरतात अशें न्हय तर समाजाक उर्बा दिवपा खातीरय वावुरतात. स्टार्ट अप इंडिया येवजणे वरवीं आयज एक नवो संवसार तुमकां उलो मारता. हे येवजणे वरवीं गोंयच्या दोन तरणाट्यांनी आयटी क्षेत्रांत संवसारांत आपली सुवात निर्माण केल्या. गोंयच्या हेर तरणाट्यांनी हे येवजणे वरवीं फकत आयटी मळाचेरूच न्हय तर हेर मळांचेरूय आपलें नांव करचें. राज्याक अर्थीक नदरेन घटमूट करचें. तशेंच सहकारी मळार काम करपी संघटनां खातीर आमी जायत्यो कार्यावळी चालीक लावपाक सुरवात केल्या, अशें तांणी म्हणलें.
पॅक्स खाला कांय सहकारी संस्थांचें पुरायेन संगणकीकरण करपा खातीर आमी मजत केल्या. येवपी काळांत सहकारी संस्थांच्या आनीक उदरगतींत आमचें योगदान सदांच आसतलें, अशें मुख्यमंत्री सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
