आतां रेल्वेंत गाडी घालात आनी चलात ‘बाॅम्बे टू गोवा’

भांगरभूंय | प्रतिनिधी

मुंबय, खबरां संस्था: मुंबय- गोंय म्हामार्ग हो कोकणांतल्यान वचपी महाराष्ट्रांतलो म्हत्वाचो म्हामार्ग. ताचें म्हामार्गाचें काम फाटलीं १२ वर्सां आडकून पडलां. हाका लागून कोकणाक वचपी प्रवाशांक खूब त्रास सोंसचे पडटात. पूण आतां स्वताचें वाहन घेवन कोकणांत वचपाचें आसल्यार रस्त्याची गरज ना. कारण, प्रवाशांक रेल्वेंत गाडी घेवन सरळ कोकणाक वचूंक मेळटलें. कोकण रेल्वेची ही खाशेली येवजण कोकणांत वचपी प्रवाशां खातीर फायद्याची थारतली. ही येवजण नेमकी कितें तें पळोवया.
कोंकण रेल्वेचे अध्यक्ष आनी वेवस्थापकीय संचालक संतोष कुमार झा हांणी हे येवजणे विशीं म्हायती दिली. फाटलीं जायतीं वर्सां जालीं कोंकण रेल्वे मार्गाचेर रो- रो रेल्वे चलता. हे सेवेखाला ट्रक गाडयेंत भरून एके सुवातेर सावन दुसरे सुवातेर व्हरतात. हेच फाटभूंयेर आतां कोकणांत वचपी प्रवाशांच्यो चार चाकी गाडयो रेल्वेंतल्यान व्हरपाक मेळटल्यो. हाचो अर्थ कोकणाक वचपी प्रवाशां खातीरय ही रो- रो गाडी सुरू जातली.
चवथ हो गोंय, कोंकणांतलो म्हत्वाचो उत्सव. भायर काम करपी हजारांनी लोक चवथीक गांवांनी येतात. चवथी वेळार गर्देचो विचार करून कोंकण रेल्वे रो-रो सेवेचो खाशेलो प्रयोग करतली. कोकणाक वचपी प्रवाशांक गाडी वा एसयूव्ही रेल्वे वरवीं व्हरपाक मेळटली. सध्या ट्रक व्हरपा खातीर वापरिल्ले रो- रो सेवेच्या खाजगी वाहनां खातीर चांचणी सुरू आसा. वेगवेगळ्या तरांच्या चार चाकी वाहनांचो आकार आनी डिझायन मतींत दवरून वॅगनांत कांय बदल करतले.
रो- रो (रोल ऑन-रोल ऑफ) ही सेवा म्हणल्यार ट्रक सरळ रेल्वे वॅगनांत चडयतात. जाल्यार, चालक आनी क्लीनर तिकीट घेवन ट्रकांत प्रवास करतात. तशेंच गाडी वॅगनांत दवरून प्रवाशांक आपल्या वाहनां सयत रेल्वेन प्रवास करपाक मेळटलो.
सध्या कोलाड ते मंगळुरू मजगतीं ही सेवा सुरु आसा. ट्रक सरळ रॅम्पा वेल्यान वॅगनांत चडयतात. हाका लागून ट्रकाचो आकार आनी वजन हांची मर्यादा आसा. तशेंच खाजगी चार चाकी वाहनां खातीरूय आकार आनी वजनाची मर्यादा निश्‍चीत करुन तशे प्रकारचे वॅगन करतले. खंयच्या स्टेशनांतल्यान ही सुविधा सुरु जातली हे विशीं म्हायती मुखार येवंक ना. मात, अंदूंचे चवथी मेरेन ही येवजण सुरू करपाचो कोकण रेल्वे यत्न करता. हो प्रयोग येसस्वी जाल्यार मुंबय- गोंय महामार्गा वेल्यान त्रासाचो प्रवास करपाची गरज पडची ना. ट्रॅफीक जॅमूय जावचो ना.