भलायकी मंत्र्याचे वागणुके आड गोमॅकाँतल्या दोतोरांचें आंदोलन
भांगरभूंय | प्रतिनिधी
व्हीआयपी हस्तक्षेप, फोन कॉल्स बंद करपाची केली मागणी
पणजी: गोंय वैजकी महाविद्यालयांत (गोमॅकाॅ) भलायकी मंत्री विश्वजीत राणे हांणी डॉ. रुद्रेश कुट्टीकर हांचे कडेन केल्ले अपमानाचे वागणुकेचो निशेध करीत सोमारा गोमॅकाँतल्या दोतोरांनी खर आंदोलन केलें. गोंय आयएमए, विभाग मुखेली, निवासी डॉक्टर आनी वैजकी विद्यार्थ्यांनी डीन डॉ. शिवानंद बांदेकार हांच्या कार्यालया मुखार निशेद केलो.
भलायकी मंत्री राणे हांणी डॉ. कुट्टीकार हांचे विशीं दाखयिल्ले वागणुकेची डॉ. कुट्टीकर हांचे सयत तांच्या कुटुंबाचीय चूक मागल्या. फकत दुयेतींक बरी वागणूक मेळची हे फाटलो होच हेत आशिल्लो. मात दुर्दैवान हाचें राजकारण करतात, अशें मंत्र्यान सांगलें. दोतोरांनी राजकारणा पसून वेगळें रावन गोमॅकाॅचें पावित्र्य राखचें आनी दुयेतींक आनीक बरी सेवा दिवची अशेंय तांणी मुखार म्हणलें.
आंदोलकांच्यो तीन मागण्यो
- भलायकीमंत्री राणे हांणी डॉ. कुट्टीकार हांची गोमॅकाँत येवन चूक मागची.
- गोमॅकाँत व्हीआयपी हस्तक्षेप, फोन कॉल्स बंद करचे.
- हॉस्पिटलाच्या खंयच्याच विभागांत व्हिडिओ काडपाक बंदी आसची.
मंत्री राणे हांणी डॉ. कुट्टीकार हांची चूक मागपाची मागणी विभाग मुखेली तशेंच निवासी दोतोरांच्या पंगडान केल्या. हे विशीं डीन डॉ. शिवानंद बांदेकार हांकां निवेदनूय सादर केलां.
व्हिडिओ आड कारवायेची मागणी
मजगतीं गार्ड अध्यक्ष डॉ. आयुष शर्मा हांणी गोमॅकोंत ७ जुनाक घडिल्ले घडणुकेचो व्हिडियो काडिल्ले प्रकरणांत गुन्यांव करपाची मागणी केल्ल्यान, हे विशींय डिनाक निवेदन सादर केलें. ह्या आंदोलनाक लागून गोमॅको वाठारांत तणावाचें वातावरण निर्माण जालां. दुयेतींची सेवा तशीच दवरपा खातीर काम करतना प्रशासनाक बरेच त्रास सोंसचे पडटले.
हे विशीं उलयतना डॉ. बांदेकर हांणी सांगलें : डॉ. कुट्टीकार हांकां अपमानाची वागणूक दिल्ले खातीर जाहीरपणान चूक मागची, ही आंदोलक दोतोरांची मागणी आमी भलायकी मंत्री विश्वजीत राणे हांचे मेरेन पावयल्या. तशेंच, ७ जुनाक घडिल्ले घडणुकेचो व्हिडियो ज्या मनशाक काडला, ताचे आड पुलिशेंत कागाळ दाखल करतले अशें स्पश्ट करीत, हे विशीं फुडली कार्यवाही सोमारा सांजेवेळार ५ वरां उपरांत थारतली, अशी म्हायती डॉ. बांदेकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
