भांगरभूंय | प्रतिनिधी
सोलापूर, खबरां संस्था: सोलापूर-गोंय विमान सेवा आयच्यान सुरू जातली. मुख्यमंत्री देवेंद्र फडणवीस, केंद्रीय राज्यमंत्री मुरलीधर मोहोळ आनी पालकमंत्री जयकुमार गोरे हांचे हाजिरेंत उक्तावण सुवाळो जातलो.
सोलापूरच्या सामान्य लोकांचें सपन आतां पुराय जातलें. कारण लोक एक सारकी वाट पळयत आशिल्ली सोलापूर-गोंय विमान सेवा सोमारा, ९ जून २०२५ सावन सुरू जातली. सोलापूरचो विमानतळ फाटलीं जायतीं वर्सां बंद आशिल्लो. हांगाच्यान खंयचीच विमान सेवा चलनाशिल्ली. हो विमानतळ फकत व्हीआयपीं खातीर वापरताले. पूण आतां ही विमान सेवा सामान्य लोकां खातीर सुरू जातली.
पयल्या टप्प्यांत सोलापूर-गोंय विमान सेवा सोमारा सावन सुरू जातली. पयल्या विमानान सकाळीं ९:५० वरांचेर गोंयचे वटेन उड्डाण केलें. ही उड्डाण सेवा फ्लाय ९१ कंपनी वरवीं सुरू जाता. ह्या हवाई दळाचें उक्तावण करपा खातीर प्रशासनान भव्य सुवाळो घडोवन हाडला.
सोलापूर-गोंय विमान सेवा पयल्या टप्प्यांत सुरू जाली काय फुडल्या टप्प्यांत सोलापूर-मुंबय, सोलापूर-तिरुपती, सोलापूर-बंगळुरू आनी सोलापूर-हैदराबाद विमान सेवाय सुरू जातली अशी अपेक्षा आसा. सोलापूर सावन वेगवेगळ्या राज्यांनी आनी शारांनी हवाई सेवा सुरू करपाचो यत्न प्रशासन आनी सरकार करतात. पूण पयल्या टप्प्यांत सादारण सोलापूरच्या लोकांक गोंयांत वचपी हवाई सेवांचो लाव मेळटलो.
विमानसेवेचें वेळापत्रक:
सोमवार आनी शुक्रार
गोंय- सोलापूर: प्रस्थान सकाळीं ७:२०, आगमन सकाळीं ८:३०
सोलापूर-गोंय: प्रस्थान सकाळीं ८:५०, आगमन सकाळीं १०:०५
शेनवार आनी आयतार
गोंय- सोलापूर: प्रस्थान दनपरां ४:०५, आगमन सांजेवेळार ५:१०
सोलापूर – गोंय: प्रस्थान सांजेवेळार ५:३५, आगमन सांजेवेळार ६:५०
तिकीट दर
गोंय – सोलापूर प्रवासा खातीर फ्लाय ९१ विमानाचें तिकीट दर ३,४९१ रुपया आसतलें. मात मागणे प्रमाण ह्या तिकीट दरांत वाड जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
