भांगरभूंय | प्रतिनिधी
इंदूर, खबरां संस्था: लग्ना उपरांत ११ मे २०२५ दिसा एक जोडपें हनिमुना खातीर शिलॉंगाक गेल्लें. ह्या जोडप्याचें नांव राजा रघुवंशी आनी सोनम रघुवंशी. तें २० मेक मेघालयांत पावलें आनी २३ मेक कुटुंबा कडेन निमाणें उलयलें. उपरांत त्या दोगांयचे फोन बंद आशिल्ले. मात २ जुनाक वेई सोडोंग घसघश्या लागसार एका व्हाळांत राजा रघुवंशीची कुशिल्ली कूड मेळ्ळी. पुलिसांनी हे विशीं खुनाचो गुन्यांव दाखल केलो. मात हें प्रकरण सध्या वेगळेच दिकेन गेल्लें पळोवपाक मेळटा. मेघालयांत हनिमुना खातीर गेल्ले इंदूरचे ट्रान्सपोर्ट वेवसायीक राजा रघुवंशीचो तिची बायल सोनमानूच खून केल्ल्याचें स्पश्ट जालें. तिणें उत्तर प्रदेशांतल्या गाजीपूर हांगा काल आत्मसमर्पण केलें.
मेघालयचे डीजीपी आय नोंगरांग हे विशीं म्हायती दितना सांगलें, इंदूरच्या राजाच्या खून प्रकरणांत मेघालय पुलिसांक व्हड येस आयलें. पुलिसांनी बायल सोनम सयत तीन आरोपींक अटक केल्या. राजा हांच्या खुना खातीर मारप्यांक हायर केल्ले. एक आरोपी उत्तर प्रदेशांतल्यान, जाल्यार दोगांक एसआयटीन इंदूरच्यान धरले. सोनमान उत्तर प्रदेशांतल्या नंदगंज पुलीस स्टेशनांत आत्मसमर्पण केलें. उपरांत तिका अटक केली.
गाझीपूरचे एसपी डॉ. इराज राजा हांणी, पॅट्रोलींगा मजगतीं पुलिसांक नंदगंजच्या काशी ढाब्याचेर एक बायल बेशुद्ध अवस्थेंत पडिल्ली दिसली. पुलीस तपासांत कळ्ळें ती सोनम रघुवंशी म्हणून.
इंदूरचे येरादारी वेवसायीक राजा रघुवंशी आनी सोनमाचें ११ मे २०२५ दिसा लग्न जाल्लें. हनिमुनाक गेल्ले कडेन तीं दोगांय बेपत्ता जालीं. उपरांत राजाची कूड एका व्हाळांत सांपडली. राजाची कूड मेळिल्ल्याक पुलीस सोनमाक सोदताले. आतां सोनम मेळ्ळे उपरांत पुलीस हे फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
