भांगरभूंय | प्रतिनिधी
प्रधानमंत्रीः भारताक गरिबी मुक्त देश करपाचें दिकेन व्हडलें पावल
नवी दिल्ली, खबरां संस्था ः भारतांत 11 वर्सांत सुमार 27 कोटी लोकांक अत्यंत गरिबींतल्यान भायर काडल्यात अशें संवसारीक बँकेन आपल्या एका अहवालांत सांगलां. संवसारीक बँकेच्या ताजे आंकडेवारी प्रमाण, 2011-12 वर्सा अत्यंत गरिबीचें प्रमाण 27.1% आशिल्लें तें 2022-23 वर्सा 5.3% जालें.
11 वर्सांत अत्यंत गरिबींत रावपी लोकांचो आंकडो 344.47 दशलक्ष (34.44 कोटी) आशिल्लो तो 75.24 दशलक्ष (7.52 कोटी) इतलो कमी जालो. अशे तरेन सुमार 27 कोटी लोकांक अत्यंत गरिबींतल्यान भायर काडले.
गरिबी उणी करपाक पांच राज्यांचो दोन तृतियांश वांटो…
प्रधानमंत्री नरेंद्र मोदी हांच्या फुडारपणा खाला धोरणात्मक उपक्रम आनी अर्थीक सुदारणांक लागून फाटल्या दशकांत ही उदरगत दिसून आयल्या. आंकडेवारी प्रमाण, 2011-12 वर्सा उत्तर प्रदेश, महाराष्ट्र, बिहार, अस्तंत बंगाल आनी मध्य प्रदेश ह्या पांच राज्यांनी देशांतली 65% अत्यंत गरीब लोकसंख्या आशिल्ली. 2022-23 मेरेन ह्या पांच राज्यांनी राष्ट्रीय गरिबी उणी करपाक दोन तृतियांश योगदान दिलां.
गरिबी मुक्त देश करपाचें दिकेन व्हडलें पावल: प्रधानमंत्री
प्रधानमंत्री आवास येवजण, प्रधानमंत्री उज्ज्वला येवजण, जन धन येवजण, आयुष्मान भारत ह्या गरीबां खातीर आशिल्ल्या सरकाराच्या येवजण्यांचो परिणाम अशें प्रधानमंत्री नरेंद्र मोदी हांणी सांगलें. ह्या सरकारी उपक्रमांक लागून लोकांक घरां, निवळ रांदपाचें इंधन, बँकींग सेवा आनी भलायकी सेवा मेळ्ळ्या. फाटल्या 11 वर्सांत केंद्र सरकारान मुळावी बांदावळ, डिजिटल समावेश आनी पारदर्शकता हांचेर लक्ष केंद्रीत करून जायत्यो येवजण्यो सुरू केल्यात, जाचो थेट फायदो गरीबांक जालां. हाचे भायर डायरेक्ट बेनिफिट ट्रान्सफर (डीबीटी), डिजिटल सेवा आनी ग्रामीण उदरगती संबंदीत कामांक लागून गरीबांक अर्थीक नदरेनय सशक्त केल्यात. ह्या सगळ्या यत्नांक लागून सुमार 27 कोटी लोकांक गरिबींतल्यान भायर सरपाक मेळ्ळां. भारताक गरिबीमुक्त राष्ट्र करपाचे दिकेन हें व्हड पावल अशें अशें प्रधानमंत्री हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
