भांगरभूंय | प्रतिनिधी
फुटीरांच्या मतदारसंघांतल्यान वेंचून हाडपाचो निश्चेव
भांगरभूंय । प्रतिनिधी
पणजी : फाटले वेंचणुकेंत काँग्रेसीचे उमेदवारीचेर वेंचून येवन भाजपांत गेल्ल्या आमदारांच्या मतदारसंघांत नवीं मुखामळां सोदपाची प्रक्रिया काँग्रेस प्रदेशाध्यक्ष अमीत पाटकार हांणी सुरू केल्या. ते नदरेन कांय जाणांक पक्षांत प्रवेश लेगीत दिला. उरिल्ल्या मतदारसंघांत लेगीत नव्या मुखामळांक संद दिवन येता ते विधानसभा वेंचणुकेंत देंवोवपाची तयारी पाटकार हांणी केल्या.
2017 आनी 2022 चे विधानसभा वेंचणुकेंत काँग्रेसीचे उमेदवारीचेर वेंचून आयिल्ल्या खूबश्या आमदारांनी भाजपांत प्रवेश केलो. ताका लागून काँग्रेसीक व्हड खांवटें पडलें. अशे स्थितींत ज्या आमदारांनी भाजपांत प्रवेश केलो, तांच्या मतदारसंघांत 2027 चे विधानसभा वेंचणुकेंत नवीं मुखामळां दिवपाचे निर्देश काँग्रेस पक्षश्रेश्ठींनी प्रदेशाध्यक्ष अमीत पाटकार हांकां दिल्यात. ते प्रमाण पाटकार हांणी फाटल्या कांय म्हयन्यां सावन प्रक्रिया सुरू केल्या. ताचोच एक भाग म्हूण वास्कोंतल्यान नंदादीप राऊत, मांद्रेंतल्यान देवेंद्र प्रभुदेसाय, कुमारजुवेंतल्यान विशाल वळवयकार, मयेंतल्यान अजय प्रभुगांवकार आनी मडगांवांतल्यान चिराग नायक हांकां पक्षांत प्रवेश दिला. काँग्रेसींत प्रवेश केल्ल्या ह्या सगल्या फुडाऱ्यांनी पक्षाच्या कामाक सुरवात लेगीत केल्या. फुडल्या काळांत काणकोण, कळंगूट, मुरगांव, दाबोळी, कुठ्ठाळी, सांतआंद्रे, सांताक्रूज, शिरोडें, शिवोली ह्या मतदारसंघांतल्यान युवा दमाचे फुडारी काँग्रेसींत प्रवेश करतले, अशी म्हायती प्रदेश काँग्रेसीच्या सुत्रांनी ‘भांगरभूंय’ कडेन उलयतना दिली.
फुटीरांक परतून उमेदवारी ना
काँग्रेसीचो विस्वासघात करून भाजपांत गेल्ल्या एकाय आमदाराक येता ते विधानसभा वेंचणुकेंत उमेदवारी दिवची न्हय, असो निर्णय पक्षश्रेश्ठींनी घेतला. नवीं मुखामळां रिंगणांत देंवोवन वेंचणूक जिखपाचोय निश्चेव केला. तेच खातीर अमीत पाटकार हांणी आतां सावनूच विधानसभा वेंचणूक जिखपाक शकतले, अश्या नव्या उमेदवारांचो सोद घेवन तांकां पक्षांत प्रवेश दिवपाची मोहीम सुरू केल्या, अशेंय सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
