भांगरभूंय | प्रतिनिधी
– भलायकी मंत्री विश्वजीत राणे हेड ऑन
– जे चल्लां तें पॉलिटिकल फिक्सींग
– जीएमसींत पाड घालपाचें कोणाचे तरी चल्ल्या यत्न
– हांव उद्धट न्हय, लोकां खातीर संवेदनशील
भांगरभूंय | प्रतिनिधी
पणजी : हांव डॉ. रुद्रेश कुट्टीकार आनी कुटुंबाची माफी मागतां, मनांतल्यान मागतां, आयएमए खातीर मागिना, अशें भलायकी मंत्री विश्वजीत राणे हांणी प्रुडन्ट मिडियाच्या हेड ऑनांत उलयतना सांगलें. वैजकी विभागाक, दोतोरांक दुखोवपाचो म्हजो हेतू नाशिल्लोच. हांव संवेदनशील मनीस, सामान्य लोकांक दुखता तें म्हज्यान पळोवं नजं. एका 77 वर्सांचे बायलेक सारकें वैजकी उपचार मेळना म्हूण कळटाच मनाचो उद्रेक जालो, तेन्ना ती अॅक्शन जाली. तशेंच हांवें सस्पेंड करता म्हणलें म्हूण ताका सस्पेंड करूंक ना. तशी ऑर्डरूय काडूंक ना. हांव माफी मागतां, मात शिस्त ही आसपाकूच जाय आनी ते खातीर हांव सदांच आगरो धरतां, अशेंय भलायकी मंत्र्यान म्हणलें.
हांव दोतोराक सस्पेंड करता म्हणलें आनी गेलो, गोंयां भायर आशिल्लो निकतोच आयलां. मात, फाटल्या 24 वरांत जें घडलां तें पॉलिटिकल फिक्सींग घडलां. कोणतरी गोंय वैजकी म्हाविद्यालयांत पाड घालपाचो यत्न करता, तेंवूय हांव सांगतां. भलायकी मंत्री म्हूण लोकां विशीं म्हाका तळमळ आसा. हांव संवेदनशील म्हूण म्हाका लोक जिखोवन हाडटात, गर्विश्ठ म्हूण न्हय. म्हाका कसलोच गर्व ना, हांव लोकां खातीर काम करपी, भलायकी मळ आवडटा म्हूण हांव हें खातें मागून घेतां. पर्रीकराच्या, दिगंबराच्या आनी आतां प्रमोद सावंत सरकाराच्या काळांत हांव भलायकी मंत्री म्हूण काम करतां, अशेंय विश्वजीत राणे हांणी सांगलें.
हांव उद्धट आसा म्हूण जे उलयतात तांणी लक्षांत घेवचें हांव उद्धट ना. दुयेंतींक बरी सेवा मेळची म्हूण हांव झप करून तापलो, मात्सो चडूच उलयलों. मात, हें म्हज्या खातीर उलोवंक ना, लोकां खातीर उलयलों. हांवें तशें उलोवंक जायनाशिल्लें. पूण मनीस म्हणल्यार जाता अशें, अशेंय मंत्री विश्वजीत राणे हांणी म्हणलें.
सोशल मिडिया इन्फ्लुएंसर सध्या म्हज्या नांवांन व्हिडियो घालीत सुटल्यात. ते गोंयकार न्हय, भायले. मात, भारतीय म्हूण ते खंयच्याय राज्या विशीं उलोवपाक शकतात. मात, खरें तें सांगचें, अशेंय तांणी म्हणलें. हांव प्रधानमंत्री नरेंद्र मोदी हांच्या विचारान चलपी मनीस. तळागाळा मेरेन भलायकी सुविधा पावपाक जाय, जण एकल्याच्या दारा मेरेन पावपाक जाय म्हूण काम करतां. लोकां खातीर काम करतना एकादो वेळ आपल्या स्टाफाचेर तापप जाता. जशें दरेक जाण बरें काम जावचें म्हूण तांच्या स्टाफाक तापयतातूच न्हय?, अशेंय मंत्री राणे हांणी म्हणलें.
जीएमसींत पयलीं हुंदीर बोटां खाताले, दोळे खाताले…
हांव भलायकी मंत्री जावचे पयलीं जीएमसींत हुंदीर बोटां खाताले, दोळे खाताले म्हूण आयकूंक येताले. हांवें थंय नव्यो गजाली हाडल्यो. अत्याधुनीक सेवा हाडल्यो. राज्यांतल्या सगल्या भलायकी केंद्रांनी बरी सेवा मेळची म्हूण म्हजो यत्न आसता. दक्षीण गोंयांत बरी सुविधा मेळपाक जाय. पेडण्यांय बरी भलायकी सुविधा मेळपाक जाय, अशेंय मंत्री राणे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
