भांगरभूंय | प्रतिनिधी
डॉ. कुट्टीकाराक अभय
भलायकी मंत्र्या कडेन चर्चा
हेर दोतोरांचेंय कवतूक
भांगरभूंय । प्रतिनिधी
पणजी : बांबोळेच्या गोंय वैजकी म्हाविद्यालयाच्या हॉस्पिटलांत (जीएमसी) आयिल्ल्या दुयेंतीक इंजेक्शन दिवपाच्या विशया वयल्यान भलायकी मंत्री विश्वजीत राणे हांणी शेनवारा उजरायल्ल्या डॉ. रुद्रेश कुट्टीकार हांकां सेवेंतल्यान निलंबीत करचे ना, अशें मुखमंत्री डॉ. प्रमोद सावंत हांणी आयतारा स्पश्ट केलें. तशेंच लोकांचो जीव वाटावपा खातीर खर मेहनत घेवपी दोतोरांचें तांणी कवतूक लेगीत केलें.
शेनवारा जीएमसींत इंजेक्शन घेवपाक आयिल्ल्या एका दुयेंतीक योग्य तरेची वागणूक दिवंक नाशिल्ल्याच्या कारणा वयल्यान भलायकी मंत्री विश्वजीत राणे हांणी मुख्य वैजकी अधिकारी डॉ. रुद्रेश कुट्टीकार हांकां सगल्यां मुखार उजरावन काडिल्लो. तशेंच डॉ. कुट्टीकार हांकां तत्काळ निलंबीत करपाचे निर्देश लेगीत तांणी वैजकी अधिक्षक डॉ. राजेश पाटील हांकां दिल्ले. कामाचेर आसतना डॉ. कुट्टीकार हांकां मंत्री राणे हांणी दिल्ल्या अपमानास्पद वागणुके खातीर काँग्रेस, आप, गोवा फॉरवर्ड ह्या विरोधी राजकी पक्षांनी आवाज काडले उपरांत तशेंच ह्या प्रकरणाची फेडरेशन ऑफ ऑल इंडिया मॅडिकल असोसिएशना सयत इंडियन मॅडिकल असोसिएशनान गंभीर दखल घेतले उपरांत मुख्यमंत्री डॉ. सावंत हांणी ह्या प्रकरणांत हस्तक्षेप केलो.
ह्या प्रकरणांत आपणे भलायकी मंत्री विश्वजीत राणे हांचे कडेन चर्चा केल्या. डॉ. रुद्रेश कुट्टीकार हांकां निलंबीत करचे ना. राज्य सरकार आनी वैजकी अधिकारी गोंयकारांचे सेवे खातीर बांदील आसा. जीएमसींतल्या दुयेंतींचो जीव वाटावपा खातीर खर मेहनत घेवपी दोतोरांचें कवतूक आसा, अशें मुख्यमंत्री डॉ. सावंत हांणी स्पश्ट केलें.
मजगतीं, डॉ. रुद्रेश कुट्टीकार हांकां मंत्री राणे हांणी दिल्ल्या अपमानास्पद वागणुकेच्या विशया वयल्यान काँग्रेस प्रदेशाध्यक्ष अमीत पाटकार हांणी आयतारा पत्रकार परिशद घेवन मंत्री राणे हांचेर टिका केली.
हॉस्पिटलांतल्या आपत्कालीन विभागांत वचून व्हिडियो काडपाचो अधिकार खंयच्याच मंत्र्याक आसना. अशें आसून लेगीत भलायकी मंत्री विश्वजीत राणे हांणी जीएमसींत वचून ते पद्दतीचो व्हिडियो काडलो. तशेंच थंयच्या दुयेंतींक सेवा दिवपी एका दोतोराक अपमानाची वागणूक केली. मंत्री राणे हांचें हें वागणें मातूय सोबा सारकें नाशिल्लें. ह्या प्रकरणांत डॉ. रुद्रेश कुट्टीकार हांचेर अन्याय जाला. प्रदेश काँग्रेस तांच्या फाटल्यान घट उबी रावतली. डॉ. कुट्टीकार हांकां न्याय मेळोवन दिवचे खातीर प्रदेश काँग्रेस वेळ आयल्या रस्त्यार देंवपाक लेगीत तयार आसा, अशें पाटकार हांणी सांगलें.
भलायकी मंत्री राणे हांणी ह्या प्रकरणांत फक्त दोतोरांचोच न्हय जाल्यार समेस्त गोंयकारांचो अपमान केला, अशें पाटकार हांणी सांगलें. ‘आयटक’सयत गोंयांतल्या हेर कामगार संघटणांनी ह्या प्रकरणाचो निशेध करून डॉ. रुद्रेश कुट्टीकार हांकां तेंको दिलो.
‘आयएमए’न दिल्ली 72 वरांची मुजत
भलायकी मंत्री विश्वजीत राणे हांणी डॉ. रुद्रेश कुट्टीकार हांकां अपमानाची वागणूक दिल्ल्यान तांचेर 72 वरां भितर कारवाय करची ना जाल्यार देशभरांत आंदोलनां करपाची शिटकावणी फेडरेशन ऑफ ऑल इंडिया मॅडिकल असोसिएशनान (आयएमए) दिल्या. ह्या प्रकरणा उपरांत मुख्यमंत्र्यांनी डॉ. कुट्टीकार हांचें निलंबन रद्द केलें. आतां फेडरेशन ऑफ ऑल इंडिया मॅडिकल असोसिएशन हे संबंदांत कसलें पावल उखलतले हाचेर सगळ्यांची नदर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
