भांगरभूंय | प्रतिनिधी
कुटुंबाक रु 7 लाखांची मजत
पणजी : होंडा लायनमनाक शॉक लागून आयिल्ल्या मरणाक 15 दीस जावन गेले तरी आजून तपास अहवाल जारी जावंक ना. तपास करपी अभियंत्यांनी तपास अहवाल सादर करूक ना, अशी म्हायती अभियंत्यां कडल्यान मेळ्ळी. इतले मजगती खात्या कडल्यान येवजणेतल्या तजविजे प्रमाण मरण आयिल्या चंद्रू गावकार हाच्या कुटुंबीयांक 7 लाखांची मजत मेळ्ळ्या, अशी म्हायती दिवचलच्या कार्यकारी अभियंत्यांनी दिल्या.
तपास करपी अभियंत्यांनी लागचे जनरेटर, इनर्वटर तशेच मीटरांची तपासणी केल्या. एमआरटी कडल्यान आजून रीडींगा विशींची म्हायती मेळूंक ना, अशी म्हायती अभियंते शैलेश बुर्ये हांणी दिली. खात्याचे अभियंते तशेच एमआरटी हांणी स्वतंत्रपणान लागच्या मिटरांची तपासणी केल्या.
लायनमॅनाक शॉक आयलो तेन्ना बंद लायनी वेल्या ट्रान्सफाॅर्मरांत वीज प्रवाह कसो आयलो हाचो तपास वीज खात्याचे दोन पंगडांनी केला. मडगांवच्या एमआरटी (मिटर रीले अॅण्ड टेस्टिंग) पंगडाचे मजतीन लागींच्या घरांतल्या मिटरांची तपासणी जाल्या. ह्या दोनूय तपास अहवालांचो विचार जावन निश्कर्श जारी जातलो. तपास करपी दरेकी अभियंत्यांचें मत वेगळें आसा.
होंडा – सत्तरी फाटल्या मंगळारा 20 मे दिसा काम करताना शॉक लागून चंद्र गावकार ह्या लायनमनाक मरण आयिल्लें. आनीक एक लायनमॅन गंभीर जखमी जाल्लो. शटडावन केले उपरांत ट्रान्सफॉर्मर तशेंच लायनींत वीज प्रवाह येता काय ना, हाची तपासणी जाल्ली. तरी काम सुरू जावन वरा उपरांत काम सुरू आशिल्ल्या ट्रान्सफॉर्मरांत वीज प्रवाह (करंट) आयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
