भांगरभूंय | प्रतिनिधी
रत्नागिरी, खबरां संस्था : मुंबय-गोंय महामार्गावेल्या बावनदी हांगा आयतारा सकाळीं जाल्ल्या भिरांकूळ अपघातांत खायगी ट्रॅव्हल्सांतले ३० शिक्षक जखमी जाले. सीएनजी गॅस व्हरपी टँकरान मिनी बसीक नेटान धपको दिल्ल्यान हो अपघात जालो. हो धपको इतलो नेटान आशिल्लो, बस रस्त्या कुशीक वचून सुमार २० फूट सकयल कोळ्ळी.
ह्या धपक्या उपरांत टँकरांतल्या सीएनजीची गळती जाली आनी गॅस हवेंत पातळून पेट घेतिल्ल्यान आशिकुशीकच्या वाठारांत बरोच बोवाळ जालो. ह्या उज्याचो नेट इतलो खर आशिल्लो, रस्त्या लागसारा उब्यो आशिल्ल्यो दोन दुचाकी, एक रिक्षा लासून गोबोर जाल्यो. जाल्यार एक म्हस लासली. मात लागसारच्या घरांतल्या लोकांनी वेळार घरा भायर सरून आपलो जीव वाटयलो.
ह्या अपघाताची म्हायती मेळटांच पुलीस, उजो पालोवपी दळ आनी येरादारी विभाग घडणुके सुवातेर पावले. गाडयेन आडकून पडिल्ल्यांक भायर काडले. त्या सगल्यांक रस्त्नागिरी जिल्लो हॉस्पिटलांत व्हेले. अपघाताक लागून महामार्गावेली येरादारी सुमार पांच वरां ठप्प जाल्ली. सध्या पर्यायी मार्गान येरादारी वळयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
