भांगरभूंय | प्रतिनिधी
नवी दिल्लीः जम्मू-काश्मीराच्या किरू जलविद्युत प्रकल्पांतलो भ्रश्टाचार हांवेंच उक्तडार हाडिल्लो. आतां ते म्हाकाच ह्या प्रकरणांत घुस्पावपाचो यत्न करतात, असो गंभीर आरोप जम्मू- काश्मीराचे आदले राज्यपाल सत्यपाल मलिक हांणी केला.
किरू जलविद्युत प्रकल्पाच्या भ्रश्टाचार प्रकरणांत आरोपपत्र दाखल जाले उपरांत 15 दिसांनी मलिकान आपलो मोनेळ सोडला. ‘एक्स’चेर पोस्टांत तांणी म्हणलां की हांव एक म्हयनो हॉस्पिटलांत आसां. म्हाका किडनीचें दुयेंस आसा. पयशे आशिल्ले जाल्यार हांव खाजगी हॉस्पिटलांत दाखल जावपाचो. ज्या प्रकरणांत ते म्हाका गुंतोवपाचो, घुस्पावपाचो यत्न करतात ती निविदा हांवेंच रद्द केल्ली. हे विशीं हांवें स्वता प्रधानमंत्र्याक कळयिल्लें. हांवें सांगले उपरांतच त्या कामाची निविदा रद्द जाली. पूण, म्हजी बदली जाले उपरांत दुसऱ्या कोणाचे तरी सहीन ते निविदेक मान्यताय मेळ्ळी. रद्द जाली फायल परत वयर सरली.
हालींच जाल्ले आरोप
22 मे दिसा किरू जलविद्युत भ्रश्टाचार प्रकरणांत सत्यपाल मलिक सयत 5 जाणांचेर सीबीआयन आरोपपत्र दाखल केल्लें. ह्या कंत्राटांत 2200 कोटी रुपयांची फटवणूक जाल्या असो आरोप आशिल्लो. 22 फेब्रुवारी 2024 दिसा सीबीआयन सत्यपाल मलिक हांच्या घराचेर धाड घाल्ली. श्री. मलिक हें गोंयचे आदले राज्यपाल आशिल्ले. हांगाच्यान तांची अचकीत बदली जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
