भांगरभूंय | प्रतिनिधी
मुख्यमंत्र्यान केली भलायकी मंत्र्या कडेन चर्चा
पणजी : शेनवारा ७ जुनाक बांबोळेचे गोवा मॅडीकल कॉलेजींत भलायकी मंत्री विश्वजीत राणे हांणी अकस्मात येवन कामाची पळोवणी केली. ह्या वेळार तांणी चीफ मेडिकल ऑफिसर डॉ. रुद्रेश कुट्टीकार हांकां सेवेंतल्यान निलंबीत करपाचे आदेश जारी केल्ले. भलायकी मंत्र्याच्या ह्या निर्णयाचो विरोधी पक्षाच्या फुडार्यांनी, समाजीक कार्यकर्त्यांनी, आयएमए सारकिल्ल्या संस्थांनी तशेंच सामान्य नागरिकांनी विरोध केलो.
मजगतीं, आयज मुख्यमंत्री डॉ. प्रमोद सावंत हांणी एक ट्विट जारी करून गोमॅकोंत काल घडिल्ले घडणुके विशीं भलायकी मंत्र्या कडेन हे विशीं चर्चा जाल्ल्याचें स्पश्ट केलें. डॉ. कुट्टीकार हांकां निलंबीत करचे ना. राज्य सरकार आनी वैजकी अधिकारी गोंयचे जनतेक दर्जेदार सेवा दिवपाक कटिबद्ध आसा अशें म्हणीत तांणी लोकांचे जीव वाटावपा खातीर खर परिश्रम करपी दोतोरांची तांणी तोखणायूय केली.
नेमकें प्रकरण कितें?
बांबोळेचे गोंय मेडिकल कॉलेजींत भलायकी मंत्री राणे हांणी शेनवारा ७ जुनाक भेट दिवन कामाची पळोवणी केली. ह्या वेळार तांणी डॉ. कुट्टीकार हांचेर कामांत हलगर्जीपणां केल्ल्याचो आरोप करीत सेवेंतल्यान निलंबीत करपाचे आदेश जारी केल्ले.
डॉ. कुट्टीकार गोमॅकोंत उपचारा खातीर दाखल जाल्ल्या एका दुयेंती कडेन वायट वागिल्ल्याची कागाळ भलायकी मंत्र्या कडेन आयली. विवीध वॉर्डांनी रुटीन पळोवणी केले उपरांत तांणी डॉ. रुद्रेश हांकां विचारलें आनी तांकां तांचे वागणुकेचो जाब विचारलो. ह्या वेळार भलायकी मंत्र्यांनी त्या दोतोराक तेन्नाच निलंबीत करपाचे आदेश जारी केले.
सांजवेळा मेरेन सोशल मिडियाचेर हे घडणुकेचो व्हिडियो व्हायरल जाले उपरांत डॉ. कुट्टीकार हाचे बाजून विरोधी पक्ष फुडारी, समाजीक कार्यकर्ते, आयएमए सारकिल्ल्यो संघटना आनी सामान्य नागरिकांनीय बोवाळ केल्लो. तशेंच कांय जाणांनी भलायकी मंत्र्यान घेतिल्ले भुमिकेची तोखणाय केली. उपरांत सांजवेळार उसरां भलायकी मंत्री राणे हांणी एकंदर प्रकरणाचेर आपली प्रतिक्रिया दिली.
कॅज्युअल्टींत गर्दी नाशिल्ल्यान डॉक्टरन दुयेतींक सहानुभूती आनी सेवा दाखोवप अपेक्षीत आशिल्लें. मात तांणी निश्काळजीपणां दाखयलो. हाका लागूनच भलायकी मंत्री म्हणून ह्या प्रकरणांत हस्तक्षेप केलो. म्हज्या उलोवपाचो सूर संयमी आसपाक जाय आशिल्लो, हें म्हाका मान्य आसा. म्हज्या संवादशैलीची जापसालदारकी हांव घेतां. मात, संबंदीत दोतोरान दुयेंतीक भलायकी सेवा न्हयकारिल्ल्यान हांव चूक मागचों ना, अशें भलायकी मंत्री राणे हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
