भांगरभूंय | प्रतिनिधी
पणजी : गोंय आनी हैदराबाद मजगतीं चलपी ड्रग्ज तस्करी आनी हवाला वेव्हारांचें व्हड रॅकेट उक्तडार आयलां. ही कारवाय तेलंगणांतल्या अँटी-नार्कोटिक्स ब्युरो आनी गोंय पुलिसांच्या गुन्यांव फांट्यान मेळोन केलां. छापेमारी मजगतीं ४९.६५ लाख रुपया चक्क वॉशिंग मशीनांतल्यान जप्त केले.
इमॅन्युएल बेदियाको उर्फ मॅक्सवेल ह्या नायजेरियन नागरिकाक हैदराबादांत अटक केल्या. ताचे कडल्यान कोकेन आनी एमडीएमएस सारकिले १.२५ कोटी रुपयाचीं घुवळे वखदां मेळ्ळीं. २०१३ वर्सा सावन तो भारतांत येतालो. गोंयांतल्या जायत्या लोकां कडेन तांचो संपर्क आशिल्लो आनी ‘सेलिब्रिटी कोकेन’ म्हणून वळखपी म्हारग वखदां तो विकतालो.
ड्रग्ज गोंयच्यान हैदराबाद, बंगळुरू आनी केरळांत धाडटाले अशें दिसून आयलां.. हाका लागून पर्रा, कळंगुटे, शिवोले आनी हणजूण ह्या वाठारांनी रावपी नायजेरीयन नागरिकांचो वापर करताले. ड्रग्ज पॅक करून ते कुरियर वा हेर मार्गान गिरायकां मेरेन पावयताले. पुलिसांक ४० गिरायकांची वळेरीय मेळ्ळ्या.
हवाला एजंटाक अटक
ह्या प्रकरणांत ‘संगीता मोबायल शॉप’चो धनी उत्तम सिंगाक अटक केल्या. तो ड्रग्ज विक्रेंतल्यान एकठांय केल्ले पयशे परदेशांत, विशेश म्हणल्यार नायजेरियाक हवाला मार्गान धाडपाचें काम करतालो. तपासांत मुखार आयलां, ताचे कडेन फकत दोन दिसांनी ५० लाख रुपया एकठांय जाल्ले.
फाटलो म्हयनोभर चार नायजेरियन नागरिकांक अटक केल्ल्यान भारतांतल्या हवाला नेटवर्क आनी आंतरराष्ट्रीय ड्रग्स माफिया मदलो संबंद उक्तो जाला. उत्तम सिंगाचेर नदर दवरून पुलिसांनी ४ जून दिसा धाड घालून रोख रक्कम जप्त केली. हे पयशे गोंयच्या म्हापश्यां लागसारचे हायलँड पार्क इमारतींतल्या फ्लॅटांत वॉशिंग मशीनांत लिपोवन दवरिल्ले. टीजीएएनबीचे मुखेली संदीप शांडिल्य हांणी सांगलें की, जर आमची कारवाय फकत एक वर उसरां जाल्ली जाल्यार हे पयशे नायजेरियांत पावोवपाचे.
नायजेरियन गटान हवाला वरवीं पयशे धाडपा खातीर एक आगळीच पद्दत वापरिल्ली. व्हॉट्सऍपाचेर ५, १०, २० रुपयांच्या नोटींचे फोटो धाडटाले. ते प्रमाण एजंटांनी तीं नोटी दाखोवन पयशे एकठांय करताले. अशे तरेन १५० परस चड वेव्हार जाले आनी एका वर्सात सुमार १० कोटी नायजेरियन नायरा परदेशांत धाडले.
हवाला वेव्हाराचो मास्टरमायंड कोण?
हवाला वेव्हारा फाटल्यान उत्तम सिंग, राजू सिंग आनी महेंद्र उर्फ बॉबी ह्या तिगांचें योगदान आशिल्ल्याचेंय चवकशेंतल्यान स्पश्ट जालां. तांणी फक्त दोन दिसांनी ५० लाख एकठांय केल्ले हाचे पुरावे मेळ्ळ्यात. ह्या सगल्या प्रकरणांची चवकशी अजून चालू आसा आनी पुलिसांच्या म्हणण्या प्रमाण भारतांत जायत्या सुवातींनी अशे ड्रग्स आनी हवाला नेटवर्क सक्रीय आसात. आनीक आरोपींचीं नांवां मुखार येवपाची शक्यताय आसा. फुडले चवकशे खातीर टीजीएनबीचो पंगड दिल्लीक गेला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
