भांगरभूंय | प्रतिनिधी
मंत्री विश्वजीत राणे हांची जीएमसीक अचकीत भेट
डॉ. रुद्रेश कुट्टीकार हाका तत्काळ निलंबीत करपाचे आदेश‘
आयएमए; कडल्यान निशेध; काँग्रेस, आपची मंत्र्यांचेर टिका
भांगरभूंय । प्रतिनिधी
पणजी : भलायकी मंत्री विश्वजीत राणे हांणी शेनवारा वैजकी अधिक्षक राजेश पाटील हांचे सयत जीएमसींत अचकीत भेट दिली. उपचारा खातीर गेंल्ल्या एके व्यक्तीक योग्य पद्दतीन वागणूक दिवंक नाशिल्ल्याचें सांगून मुख्य वैजकी अधिकारी डॉ, रुद्रेश कुट्टीकार हाका उजरावन काडलो. तशेंच डॉ. कुट्टीकार हाका तत्काळ निलंबीत करपाचे निर्देश लेगीत तांणी डॉ, पाटील हांकां दिले. हाचो इंडियन मॅडिकल असोसिएशनाच्या (आयएमए) गोंय विभागान निशेध केलो. जाल्यार विरोधकांनीय मंत्री राणे हांचेर टिका केल्या.
शेनवारा जीएमसींत इंजेक्शन घेवपा खातीर गेल्ले एके व्यक्ती कडेन डॉ. कुट्टीकार हाणें योग्य तरेन वर्तन करूंक ना. इंजेक्शन घेवपा खातीर जीएमसींत येवपा बदला अर्बन हेल्थ सेंटरांत वचपाचो सल्लो तांणी संबंदीत व्यक्तीक दिल्ल्याची म्हायती मेळटाच तिडकल्ले मंत्री राणे हांणी तत्काळ जीएमसींत वचून डॉ. कुट्टीकार हाका सगल्यां मुखार उजरावन काडलो.
जीएमसींतले दोतोर दुयेंतींची सेवा करचे खातीर आसतात. दुयेंतीं वांगडा तांची वागणूक बरी आसपाक जाय. दुयेंतीं कडेन उलयतना दोतोरांनी जिबेचेर ताबो दवरपाक जाय. जीएमसींतले खूबशे दोतोर दुयेंतींक बरी सेवा दितात, पूण डॉ. कुट्टीकार हाचे सारके कांय जाण उर्मटपणान वागतात. जे दोतोर गरीब दुयेंतींची सेवा करिनात, तांचेर कारवाय करपा बदला दुसरो पर्याय आपले कडेन ना, अशें मंत्री राणे हांणी पत्रकारां कडेन उलयतना म्हणलें.
मजगतीं, भलायकी मंत्री राणे हांणी फाटल्या कांय म्हयन्यां सावन जीएमसींतलो कारभार आनी दोतोर, कर्मचाऱ्यांच्या कामाचेर चड लक्ष केंद्रीत केलां. भ्रश्टाचार वा गैरवेव्हारांत सांपडिल्ल्या कांय जाणांचेर फाटल्या कांय म्हयन्यांत निलंबनाची कारवाय लेगीत तांणी केल्या. शेनवारा दुयेंती कडेन योग्य वर्तन करूंक नाशिल्ल्या प्रकरणांत डॉ. कुट्टीकार हांकां निलंबीत करपाचे आदेश तांणी जारी केल्यात.
मंत्र्यांचे कृतीचो ‘आयएमए’ वतीन निशेध
शेनवारा जीएमसींत डॉ. रुद्रेश कुट्टीकार हांचे कडल्यान जें कितें घडलें, तो विशय भलायकी मंत्री विश्वजीत राणे हांकां दुसरे पद्दतीन हाताळपाक जातालो. पूण तांणी सेवेचेर आसतना डॉ. कुट्टीकार हांकां भौशीक तरेन अपमानाची वागणूक दिली. मंत्र्यांचे हे कृतीचो आमी जाहीर निशेध करतात, अशें पत्रक इंडियन मॅडिकल असोसिएशनाच्या (आयएमए) गोंय विभागान शेनवारा जारी केलां. डॉ. कुट्टीकार हांचें निलंबन सरकारान तत्काळ रद्द करचें, अशी मागणी लेगीत ‘आयएमए’च्या गोंय विभागाचे अध्यक्ष डॉ. दत्ताराम देसाय हांणी केल्या.
काँग्रेस, आप कडल्यान टिका
जीएमसींतल्या एका दोतोराचो मंत्री विश्वजीत राणे हांणी भौशीक तरेन केल्लो अपमान लजेक घालपी आसा. स्वता दोतोर आशिल्ले मुख्यमंत्री प्रमोद सावंत हांणी ह्या प्रकाराची गंभीर दखल घेवन भलायकी मंत्र्यांचेर तत्काळ कारवाय करची, अशी मागणी काँग्रेस प्रदेशाध्यक्ष अमीत पाटकार हांणी केल्या. मंत्री राणे हांचे वागणुकेंतल्यान तांचे मदली अहंकारी वृत्ती दिसून आयली. एका जापसालदार मंत्र्याक अशे तरेचें वर्तन सोबना, अशेंय पाटकार हांणी सांगलें. आप फुडारी रामराव वाघ हांणी म्हणलां, कामाचेर आशिल्ल्या एका दोतोराक मंत्री राणे हांणी सगल्यां मुखार दिल्ले वागणुकेची दखल घेवन मुख्यमंत्र्यान तांचेर कारवाय करपाकूच जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
