भांगरभूंय | प्रतिनिधी
फाटल्या तीन वर्सांत लाभार्थ्यांचो आंकडो तीन पटींनी वाडलो
भांगरभूंय । समीप नार्वेंकार
पणजी : आदिवासr कल्याण खातें आदिवासी समाजांतल्या अनाथ आनी विधवा बायलांच्या भुरग्यां खातीर अर्थीक मजत दिवपाची येवजण राबयता. फाटल्या पांच वर्सांत 4 हजारां परस चड लाभार्थ्यांनी हाचो लाव घेतला. सरकारान 11 कोटी रुपया मेरेनची अर्थीक मजत ह्या लाभार्थ्यांक दिल्या. फाटल्या तीन वर्सांत लाभार्थ्यांचो आंकडो तीन पटींनी वाडला, अशी म्हायती आदिवासी कल्याण संचालनालयान दिल्या.
संचालनालयाच्या अधिकाऱ्यान दिल्ले म्हायती प्रमाण एसटी समाजांतल्या अनाथ तशेंच विधवा बायलांच्या भुरग्यांक ती 18 वर्सां पिरायेची जाय मेरेन तांकां जेवण, कपडे आनी आलाशिऱ्या खातीर अर्थीक मजत हे खाशेले येवजणे वरवीं दितात.
हे येवजणे खाला जी विधवा आसा तिच्या दर भुरग्या फाटल्यान दर म्हयन्याक 2.500 रुपया आनी अनाथ भुरग्यांक दर म्हयन्याक 3,000 रुपया निश्चीत देखरेख भत्तो दिता. हे येवजणेच्या फाटल्या पांच वर्सांत 4443 लाभार्थांक लाव मेळून सरकारान 11 कोटी रुपयांचो निधी खर्च केला. फाटल्या पांच वर्सांत हे लाभार्थी सेगीत वाडत आसात. 2020-21 त 600 लाभार्थी आशिल्ले आनी आतां 2024-25 त ही संख्या 1 हजार लाभार्थ्यां मेरेन पावल्या.
जी बायल आदिवासी समाजांतली आसा आनी जर आदिवासी नाशिल्ली बायल आदिवासी समाजांत लग्न जाल्या तिच्याय सान पिरायेच्या भुरग्यांक हो लाव मेळटा. 18 वर्सां पिराये खालच्या फक्त दोन भुरग्यांक हे येवजणेची मर्यादा आसा. विधवा बायलेची वर्सुकी येणावळ 3 लाख रुपयां परस चड आसपाक जायना. तशेंच अनाथ भुरगीं ही आदिवासी समाजांतली आसपाक जाय. तीं 18 वर्सां पिरायेचीं जाय मेरेन तांकां साबांळपी पालक, आजो-आजी आनी धर्मशाळा वा अनाथालय हांचे देखरेखी खाला आसपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
