भांगरभूंय | प्रतिनिधी
गोंय देशांत दुसऱ्या नंबराचेर, मेघालय पयले सुवातेर
भांगरभूंय । प्रतिनिधी
पणजी : अंदूं गोंयांत मॉन्सून बेगीन पावलो. गोंयांत 20 ते 29 मे मेरेन पावसान नेटाची हाजेरी लायिल्ली. हाका लागून गोंयांत मे म्हयन्यांतली पावसाची सरासरी वाडपाक मजत जाली. 1 ते 31 मे ह्या काळांत गोंयांत सरासरी 26.42 इंच पावसाची नोंद जाली. मे म्हयन्यांत पावसाचें प्रमाण चड आशिल्ल्या राज्यां मदीं गोंय दुसरे सुवातेर आसा. वयल्या काळांत मेघालयांत सगल्यांत चड 29.64 इंच पावसाची नोंद जाली. जाल्यार केरळांत 23 इंच पावस पडलो. केरळा उपरांत त्रिपुरांत 14.90, आसामांत 13.17 इंच, अरुणाचल प्रदेशांत 11.94 इंच, मणिपूरांत 11.67 इंच पावसाची नोंद जाल्या.
सध्या मॉन्सून महाराष्ट्राच्या मध्या मेरेन पावला. मात फावोशें वातावरण नाशिल्ल्यान फाटले कांय दीस मॉन्सून फुडें सरूंक ना.
अंदूं केरळांत मॉन्सून 24 जूनाक पाविल्लो. अरबी दर्यांतल्या फावोश्या वातावरणाक लागून मॉन्सून एका दिसांत म्हणल्यार 25 मेक गोंयांत पावलो. मॉन्सून तशेंच मॉन्सूनपूर्व काळांत जाल्ल्या उटंगराच्या पावसाची नोंद जाल्या.
गोंयांत 1 ते 31 मे ह्या काळांत सरासरी 26.42 इंच पावसाची नोंद जाल्ली. तातूंतलो 25.09 इंच पावस 20 ते 29 मे ह्या 10 दिसांच्या काळांत पडिल्लो. पोरूं 1 ते 31 मे ह्या काळांत सरासरी 4.64 इंच पावसाची नोंद जाल्ली. पोरूंचे तुळेंत अंदूं पांच पटींनी अदीक पावसाची नोंद जाल्या. पोरूं 24 जूनाक पावसान 25 इंचांची सरासरी पुराय केल्ली. अंदूं सुमार एक म्हयनो आदींच म्हणल्यार 29 मेक पावसान 25 इंचांची सरासरी पुराय केली. गोंयांत वत – पावसाचो सध्या खेळ चल्ला. अशें आसलें तरीय 14 जूना उपरांत पावसाचो नेट वाडपाची शक्यताय आसा.
शेनवारा गोंयांत तुरळक पावसाची नोंद जाली. भोवतेक वाठारांनी खर वत पडिल्लें. पणजे चडांत चड 32.8 अंश आनी उण्यांत उणें 26 अंश सेल्सियस तापमानाची नोंद जाली. मुरगांवां चडांत चड 32.6 अंश जाल्यार उण्यांत उणें 27 अंश सेल्सियस तापमान आसलें. हवामान खात्यान गोंयांत 9 ते 13 जून ह्या काळांत गोंयांत किरकोळ ते मध्यम स्वरुपाच्या पावसाची शक्यताय उक्तायल्या. फुडले स दीस गोंयांतले चडांत चड तापमान 32 ते 33 अंश जाल्यार उण्यांत उणें तापमान 26 अंश सेल्सियस मेरेन पावपाची शक्यताय आसा. गोंयांत 1 ते 4 जून मेरेन गोंयांत सरासरी 2.85 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
