भांगरभूंय | प्रतिनिधी
म्हापशें मोटार अपघात दावा लवादाचो आदेश
म्हापशेंः सावंतवाडो, आमोणा जाल्ल्या बस अपघातांत जखमी जावन दिव्यांग जाल्ल्या विनय उर्फ विनायक भिकाजी सावंत (सावंतवाडो, आमोणा) हाका नो फॉल्ट दायित्व रक्कमे सयत 24. 46 लाख रुपया भरपाय रक्कम दिवपाचो आदेश म्हापशें मोटार अपघात दावो न्यायाधिकरणान (लवाद) बस चालक, मालक आनी विमो कंपनीक दिला.
ह्या भरपाय दाव्या प्रकरणांत बस चालक आनी मालक प्रदीप सुहास नायक (आमोणा) आनी नॅशनल इन्शुरन्स कंपनी लिमिटेड (दिवचल शाखा) हांकां प्रतिवादी केल्ले.
आमोण्यां बस स्टॉपा लागसार 31 जुलय 2013 दिसा रातच्या सुमार 10.20 वरांचेर हो अपघात जाल्लो. दावेदार विनय सावंत हो वेवसायान नुस्तें विकपी मार्शेल ते आमोणा मजगतीं जीए 05 टी 2727 क्रमांकाच्या प्रवासी बशींतल्यान वतालो.
घडणुकेच्या वेळार प्रतिवादी बस चालकान बस स्टॉपा लागसार बस उबी केल्ली. त्या वेळार दावेदारान बशीचें दार उगडलें तेन्ना बस चालकान अचकीत बस रिव्हर्सात व्हेली. त्या वेळार दावेदार उक्त्या दारांतल्यान सकयल पडलो आनी बशीचो टायर ताच्या पांयावेल्यान गेलो. ह्या जखमी पांयांचेर जीएमसींत सात वेळार शस्त्रक्रिया केली.
घडणुकेच्या वेळार दावेदाराची पिराय 44 वर्सां आशिल्ली आनी ताका नुस्ते विकून म्हयन्याक 15 हजार रुपया येणावळ मेळटाली. ह्या अपघाताक लागून दिव्यांग जाल्ल्यान दावेदार सावंत हांणी मार्च 2017 वर्सा न्यायालयांत दावो याचिका दाखल करून 10 लाख रुपया लुकसाण भरपाय मागली. हातूंत 1 लाख रुपया वैजकी खर्च, वखदां 66 हजार 559 रुपया आनी हेर प्रवास खर्चाचोय आसपाव आशिल्लो.
लवादाच्या पीठासीन अधिकारी शर्मिला पाटील हिणें मार्च 2017 सावन 6 टक्के वर्सुकी व्याजा वांगडाच 22 लाख 46 हजार 560 रुपया लुकसाण भरपाय दिवपाचो आदेश दिलो.
तशेंच प्रतिवादी विमो कंपनीन मोटार अपघात दावे न्यायालय, म्हापशेंच्या स्टेट बँकेच्या चालू बँक खात्यांत व्याजा वांगडा उल्लेख केल्ली रक्कम जमा करची आनी न्यायालयाक आनी दावेदाराक हे विशीं कळोवचें अशेंय लवादान ह्या निर्णयांत निर्देश दिल्यात.
अॅड. एस. नायक आनी अॅड. एम. साळकार हांणी याचिकादार दावेदाराचे वतीन लवादाच्या युक्तीवाद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
