भांगरभूंय | प्रतिनिधी
दूरसंचार मंत्रालयान केलो परवानो मंजूर
नवी दिल्ली, खबरां संस्था ः अमेरिकन वेवसायीक एलॉन मस्क हांच्या उपग्रह इंटरनॅट सेवा पुरवणदार स्टारलिंकाक केंद्रीय दूरसंचार मंत्रालयान म्हत्वाचो परवानो दिल्ल्यान स्टारलिंकाक भारतांत वेवसायीक इंटरनॅट सेवा दिवपाची वाट मेकळी जाल्या. ही म्हायती रॉयटर्स खबराच्या सूत्रांनी दिली. मस्क हांची स्टारलिंक ही असो परवानो मेळोवपी तिसरी कंपनी. दूरसंचार मंत्रालयान हाचे पयलीं युटेलसॅटाच्या वनवेब आनी रिलायन्स जियोक हो परवानो दिला.
स्टारलिंक म्हणल्यार कितें?
स्टारलिंक ही अमेरिकन वेवसायीक एलॉन मस्क हांच्या स्पेसएक्स कंपनीची उपग्रह इंटरनॅट सेवा. मस्क कंपनीचो 100 परस चड देशांनी हाय-स्पीड डेटा सेवा दिवपाचो हेत आसा. स्टारलिंक इंटरनॅट सेवा केबल आदारीत ब्रॉडबँड सेवा परस वेगळी आसा. कारण स्टारलिंक उपग्रह इंटरनॅट सेवा मळबाचे थेट दृश्य आशिल्ल्या खंयच्याय सुवातेर काम करता. धर्तरेचेर पयसुल्ल्या सुवातींनी लेगीत इंटरनॅट दिवपाचो हेत मस्क कंपनीचो आसा.
Viasat, HughesNet आनी Amazon सारकिल्ल्यो कंपनी जायत्या वर्सां सावन इंटरनॅट सेवा दितात. पूण स्टारलिंक तांचे मुखार आसा, कारण तातूंतल्यान वायरलेस हाय-स्पीड इंटरनॅट मेळूंक शकता. थोड्या व्हडल्या उपग्रहांचेर आदारून रावचे परस स्टारलिंक एकामेकांमदीं सिग्नल प्रसारीत करपा खातीर लेसर आशिल्ल्या जायत्या ल्हान उपग्रहांचो उपेग करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
