भांगरभूंय | प्रतिनिधी
कटरा- श्रीनगर वंदे भारतचें उक्तावण: १० वरांचो प्रवास ३ वरांनी जातलो पुराय
श्रीनगर, खबरां संस्था: जम्मूक चिनाब न्हंयेचेर बांदिल्लो संवसारांतल्या सगल्यांत उंच रेल्वे पुलाचें उक्तावण प्रधानमंत्री मोदी हांणी आयज सकाळीं ११ वरांचेर बावटो हुबोवन केलें. ह्या वेळार तांणी रेल्वे अधिकारी आनी पूल बांदपी कामगारांची भेट घेतली.
उपरांत, प्रधानमंत्री कटरा रेल्वे स्टेशनाचेर पावले आनी काश्मीराक देशाच्या उरिल्ल्या भागा कडेन जोडपी कटरा- श्रीनगर वंदे भारत ट्रेनीक पाचवो बावटो दाखयलो. तशेंच, ते ४६ हजार कोटी रुपयां परस चड किमतीच्या हेर उदरगतीच्या प्रकल्पांची पायाभरणी आनी उक्तावण करतले. ते कटरा स्टेडियमांत जाहीर बसकाय घेतले.
फाल्यांच्यान वंदे भारत ट्रेन सुरू
उत्तर रेल्वे ७ जून सावन कटरा-श्रीनगर मार्गार वंदे भारत ट्रेन सेवा सुरू करतले. आयआरसीटीसी वेबसायटीचेर तिकेट बुकींग करपाक मेळटली. कटरा आनी श्रीनगर मजगतीं सप्तकांतल्यान ६ दीस दोन गडयो धांवतल्यो.
उत्तर रेल्वेन सांगलें, ट्रेनींत दोन प्रवास वर्ग आसात. चेअर कारचें भाडें ७१५ रुपया आनी एक्झिक्युटिव्ह क्लासचें भाडें १३२० रुपया आसा. सध्या गाडयो फकत बनिहाल हांगा थारतल्यो. हेर स्टॉपांचो निर्णय मागीर घेतले.
१० वरांचो प्रवास सुमार ३ वरांनी पुराय
स्वातंत्र्याच्या ७६ वर्सां उपरांतूय, बर्फ पडपाच्या काळांत काश्मीर खोरे देशाच्या हेर भागां पसून पयसूच उरता. जेन्ना बर्फ पडटा तेन्ना राष्ट्रीय महामार्ग-४४ बंद जाता आनी काश्मीर खोर्यांत वचपाचो मार्गूय बंद जाता.
तशेंच, जम्मू ते काश्मीर हो रस्ता मार्गान प्रवास करपा खातीर आदीं ८ ते १० वरां लागतालीं. ट्रेन सुरू जाल्ल्यान हो प्रवास आतां सुमार तीन वरांनी पुराय जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
