भांगरभूंय | प्रतिनिधी
नवी दिल्ली, खबरां संस्था: भारतीय रिझर्व्ह बँकेन व्याजदर ०.५० टक्क्यांनी उणो करून ५.५० टक्क्यांनी केला. हाचो अर्थ येवपी काळांत रीण सवाय जावंक शकता. तुमचो ‘ईएमआय’यूय उणो जातलो. ६ जुनाक सकाळच्या १० वरांचेर चलन धोरण समितीचे बसकेंतल्या निर्णयां विशीं आरबीआयचे गव्हर्नर संजय मल्होत्रा हांणी म्हायती दिली. ही बसका ४ जून सावन सुरू जाली.
अंदूं रेपो दरांत वट्ट १% कपात
अंदूं फेब्रुवारी म्हयन्यांत जाल्ले बसकेंत व्याजदर ६.५% वेल्यान ६.२५% मेरेन उणें केलें. ही कपात सुमार ५ वर्सांनी चलनविशयक धोरण समितीन केली. उपरांत एप्रिलांत जाल्ले बसकेंतूय व्याजदर ०.२५% न उणें केलें. आतां तिसरे फावट दर उणें केलां. म्हळ्यार, चलनविषयक धोरण समितीन तीन फावटीं व्याजदर १% न उणें केलां.
खंयचे बदल जातले?
रेपो दर उणो जाले उपरांत बँको घरा आनी ऑटो अशा रिणाचेरूय व्याजदर उणें करूंक शकतात. व्याजदर उणो केल्यार घरांची मागणी वाडटली. चड लोकांक रियल इस्टेटांत गुंतवणूक करपाक मेळटली. हाका लागून रियल इस्टेट क्षेत्राक चालना मेळटली.
रिणां कशीं सवाय जातात?
आरबीआय बँकांक ज्या व्याजदरान रीण दिता ताका रेपो दर अशें म्हण्टात. रेपो दर उणो जातलो तसो बँकांक उण्या व्याजदराचेर रीण मेळटलें. बँकांक सवाय दरांत रीण मेळटा तेन्ना ते चड करून गिरायकांक फायदो करून दितात. म्हणल्यार बँकोय आपलें व्याजदर उणें करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
