भांगरभूंय | प्रतिनिधी
खाजन शेतीचे उदरगती खातीर खाजन म्हामंडळाची शिफारस
भांगरभूंय । प्रतिनिधी
पणजी : खाजन शेतीचें प्रमाण वाडपा सयत उदरगती खातीर खाजन म्हामंडळ स्थापन करपाची शिफारस खाजन वेवस्थापन आराखड्यांत आसा. खारसाणी प्रमाण खाजन जमनीची चार वाठारांत विभागणी केल्या. खंयच्या वाठारांत कसली शेती करपाक योग्य आसा, तें लेगीत आराखड्यांत स्पश्ट केलां.
शेती सयत फलोत्पादन तशेंच नुस्तें पोसपाचो उपक्रम लेगीत खाजन जमनींत करप लावकारी थारतलो. प्रदुशण नियंत्रण मंडळाचे आदले अध्यक्ष सायमन डिसोझा हांच्या फुडारपणा खाला स्थापन केल्ले समितीन हो आराखडो तयार केला.
कायदे करपाची शिफारस करपा सयत तरेकवार येवजण्यो तयार करून कार्यवाही करपा खातीर खाजन म्हामंडळ स्थापन करपाची गरज आसा. हे खातीर सरकाराक योग्य तो निर्णय घेवचो पडटलो. सामकी उणी खारसाण (के 1, 5 पीपीटी मेरेन ), मध्यम खारसाण (के 2), चड खारसाण ( के 3) आनी प्रमाणा भायर खारसाण (एचके) ह्या चार वाठारांत खाजन जमनीची विभागणी केल्या. सामकी उणी खारसाण (के1) आशिल्ले जमनीचेर भाजी तशेंच दोन हंगामांत एकदां भात रोवपा खातीर योग्य आसा. मध्यम खारसाण (के 2) आशिल्ले जमनीचेर कोर्गूट, ज्योती ह्या प्रकारच्या भाताची शेती बरी जातली. चड खारसाण (के 3) आशिल्ले जमनीचेर परंपरीक भाता सयत मिठागरां आनी नुस्तें पोसपाची शेती करपाक योग्य आसा. चड खारसाण (एचके) आशिल्ले जमनीचेर कांदळीची (मॅन्ग्रोव) लागवड योग्य थारतली. ह्या जमिनींचेर शेती जावची ना, अशी शिफारस आराखड्यांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
