भांगरभूंय | प्रतिनिधी
इस्लामाबाद, खबरां संस्था: पाकिस्तानाच्या सिंध आनी पंजाब प्रांतांत, अहमदिया मुस्लिमांक ईद मनोवपा पसून आडावपा खातीर बळयां सोपूत पत्रां भरपाक लायल्यांत. जर तांणी ईद मनयली जाल्यार तांकां ५ लाख रुपया दंड भरचो पडटलो, अशी खर शिटकावणीय दिल्या.
पंजाब आनी सिंधच्या खुबश्या वाठारांनी अहमदिया समुदायांचेर घरांत धर्मीक विधी आनी कुर्बानी करची न्हय अशें चेंपण हाडटा. अंदूं ईद ७ जुनाक मनयतले. मीडिया रिपोर्ट्स प्रमाण, खुबश्या सुवातांचेर पुलिसांनी अहमदिया पंथाच्या मुस्लिमांक ताब्यांत घेवन तांकां सोपूतपत्रांचेर सही करपाक सांगल्या.
पाकिस्तानांत २० लाख अहमदिया
पाकिस्तानांतलो अहमदिया समुदाय सदांच सरकार आनी कट्टरपंथीयांचें लक्ष्य थारला. ऍम्नेस्टी इंटरनॅशनलच्या जून २०२४ च्या अहवाला प्रमाण, ईदाच्या दिसा कुर्बानी दिवपा पसून आडावपा खातीर पंजाबांत उण्यात उण्या ३६ अहमदियांक अटक केली. पाकिस्तानांत सुमार २० लाख लोकसंख्या आशिल्ल्या अहमदिया समुदायांचो खूब वर्सां सावन छळ जायत आसा. १९७४ चे घटनादुरुस्ती प्रमाण तांकां मुस्लीम मानिनात.
तांकां कुराण वाचपाची, नमाज पठण करपाची वा उक्तेपणान धर्मीक प्रथा पाळण्याची परवानगी ना. तशेंच, तहरीक-ए-तालिबान पाकिस्तान आनी तहरीक-ए-लब्बैक पाकिस्तान ह्यो संघटणां तांचेर हल्लो करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
