भांगरभूंय | प्रतिनिधी
पणजी : फाटलें सप्तकभर आगशेच्या व्हाळांतलें काळें घाणयारें उदक आनी तातुंतलो कोयर रस्त्या कुशीक आशिल्ल्या शेतांत आयिल्ल्यान पुराय वाठारांत भंयाचें वातावरण पातळ्ळां. हें उदक सरळ ह्या वाठारांत आशिल्ल्या मुखेल उदकास्रोतांत वता. हाका लागून शेती, हेर उदकाचे स्रोत, जनावरां आनी थळाव्यांचे भलायकेचेर गंभीर परिणाम जावपाची शक्यताय उक्तायल्या. ह्या उदकाचो रंग आनी दुर्गंध घेतल्यार तें उद्देगीक रसायन वा घाणयारें उदक आशिल्ल्याचो दुबाव शेतकारांनी उक्तायला.
ह्या दुशीत उदकाक लागून कांतीचीं दुयेंसां आनी जळारांक लागून जावपी दुयेंसांचो धोको वाडला. शेतकार तात्पुरतें शेतांनी काम बंद केलां. खुबश्या शेतकारांनी शेतांचें लुकसाण जाल्ल्याचीय म्हायती दिल्या. तशेंच जनावरांकूय उदक दितना भंय दिसता अशेंय तांणी स्पश्ट केलां. विशेश म्हळ्यार हें उदक मुखेल व्हाळा पसून वट्ट एक किलोमीटर अंतराचेर शेतांनीं पावलां. थळाव्यांच्या मतान, पायपांची गळती वा जलनिचरा यंत्रणेंत इबाड हे फाटलें कारण आसपाक जाय. तशेंच रातच्या वेळार उद्देगीक घाणयार्या उदकाची येरादारी करपी टँकर्सच्यान हें उदक सोडटात असोय दुबाव उक्तायला.
प्रशासनान हाची दखल घेवन पर्यावरण खात्याच्या तज्ज्ञांक उदकाचे नमुने एकठांय करपाचे आदेश दिल्यात. आगशी बायपास, पाद्रीभाट आनी लागसारच्या वाठारांतल्यान नमुने संकलीत केल्ल्यान तांचे रासायनीक परीक्षण सुरू आसा. मात थळाव्यांचो आरोप आसा, आठ दीस जावन लेगीत खर कारवाय जावंक ना.
धक्को दिवपी गजाल म्हळ्यार, व्हाळांतल्यान सोडिल्लें दुशीत उदक आतां गांवांतल्या मुखेल स्त्रोतांत आनी झुआरी न्हंयेंतूय मिसळिल्ल्यान जलजीवसृष्टी आनी वेवसायाचेरूय धोका निर्माण जाला. आतां मेरेन परंपरीक ’मानशेकार’ नुस्तेंमार्यांचें सुमार तीन ते चार लाख रुपयांचें लुकसाण जाल्ल्याची म्हायती मुखार आयल्या. हे फाटभूंयेर थळाव्यांनी दोशींचेर खर कारवाय करपाची आनी प्रदुशणाचो स्रोत बेगोबेग आडावपाची मागणी केल्या. आगशे वाठारांतलो पर्यावरणीय समतोल धोक्यांत आयलां, प्रशासनान पारदर्शक आनी खर पावलां उबारपाची गरज निर्माण जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
