भांगरभूंय | प्रतिनिधी
थळाव्यो समिती, ग्रामसभांक लागून दावे निकालांत काडपाक कळाव
पणजी : रान हक्क कायद्या खाला सनदी खातीरचे सगले अर्ज १९ डिसेंबर २०२५ मेरेन निकालांत काडपाची घोशणां मुख्यमंत्री डॉ. प्रमोद सावंत हांणी केली. थळाव्यो समित्यो आनी ग्रामसभांक उशीर जाल्ल्यान अर्ज निकालांत काडपाक कळाव जाल्ल्याचें मुख्यमंत्र्यांनी स्पश्ट केलें.
मुख्यमंत्री डॉ. सावंत हांणी बुधवारा आदिवासींच्या रान हक्क दाव्यांविशींची उच्च पातळेचेर बसका घेतली. बसकेक मुखेल सचीव, महसूल सचीव, जिल्लोधिकारी आनी रान खात्याचे अधिकारी हजर आशिल्ले. आदिवासींच्या रान हक्क दाव्यांचे अर्ज निकालांत काडपाची काळ मर्यादा बसकेंत निश्चीत केली. बसके उपरांत मुख्यमंत्र्यांनी पत्रकार परिशदेंत रान हक्क दाव्यांच्या अर्जांची स्थिती स्पश्ट केली.
रान हक्क सनदी खातीर आयिल्ल्या १० हजार ५०० अर्जां मदले आतां मेरेन ८७१ अर्ज निकालांत काडल्यात. आतां मेरेन ९४९ अर्ज भायर मारल्यात. १५० सनदींचें वांटप ९ जुनाक फोंड्यां जावपी विशेश कार्यावळींत जातलें. राज्यांतल्या ६ म्हालांत १४ जुनाक खास शिबिरां आयोजीत करतले. ह्या शिबिरांत उपजिल्लोधिकारी सुनावणी घेवन अर्ज निकालांत काडटले. तशेंच सनदीसंबंधीच्या खटल्यांचेर चर्चा करपा खातीर २१ जुनाक ग्रामसभांचें आयोजन केलां.
आदिवासींचो वन हक्क सनदीचो विशय हो २००६ सावन आडकून आसा. २००६ ते २०१९ मेरेन एकूय अर्ज निकालांत काडूंक नाशिल्लो. म्हज्याच सरकाराच्या काळांत सुमार २ हजार अर्ज निकालांत काडले. आतां जे ८५०० अर्ज आसात, ते १९ डिसेंबर मेरेन निकालांत काडटले. हाका लागूनच काळ मर्यादा वा वेळापत्रक निश्चीत केलां. रान हक्क दावे निकालांत काडपा खातीर समित्यो स्थापन केल्ल्यो. ह्यो समितीच्यो बसका वेळार जायनात. जायते फावटीं अर्जदार ग्रामसभांक हजर रावनात. आतां सरकारी कर्मचारी फायल्स हातावेगळ्यो करतले. बिरेस्तारा उत्तर आनी दक्षीण गोंयचे जिल्लोधिकारी आडखळिल्ल्या वन हक्क दाव्यांविशीं बसका घेतले. हे बसकेक पंचायत सचीव, बीडीओ, जोड मामलेदार हजर रावतले. उपरांत १४ जुनाक काणकोण, सांगें, केपें, फोंडें, धारबांदोड्यां आनी सत्तरी म्हालांत रान हक्क दावे निकालांत काडपा खातीर खास शिबिरां जातलीं. काणकोण (८८२), केपें (४६०), धारबांदोडें (५८), सत्तरी (२२), फोंडें (२१), सांगें (२२) ह्या म्हालांतले १९६५ अर्ज शिबिरांत निकालात काडटले. उपरांत १८ जुनाक उपजिल्लोधिकारी ३९७० अर्ज निकालांत काडपा खातीर बसका घेतले. जिल्लोधिकारी पातळेचेर ५६४ अर्ज आडकून आशिल्ल्यान २१ जून उपरांत ते निकालात काडटले, अशी म्हायती मुख्यमंत्री डॉ. सावंत हांणी दिली.
एजन्सीन काम सोडिल्ल्यान समस्या
रान हक्क दाव्यां खातीर जे एजन्सीची नियुक्ती केल्ली, त्या एजन्सीन मदींच काम सोडून दिलें. हाका लागून समस्या निर्माण जाली. आतां तेच एजन्सीची परत नव्यान नियुक्ती करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
