भांगरभूंय | प्रतिनिधी
पणजी : बनावट कागदपत्रांच्या आदारार जमनी हडप केल्ल्या प्रकरणांत चर्चेक आयिल्लो वेवसायीक रोहन हरमलकार हाका निमाणें सक्तवसुली संचालनालयान (ईडी) मनी लॉन्ड्रिंग कायद्या खाला अटक केली. म्हापशां पयलें वर्ग न्यायालयान ताका १४ दिसांची ईडी बंदखण आयकयल्या. २०२२ वर्सा हरमलकार हांणी कुंभारजुवें मतदारसंघांतल्यान वेंचणूक लढयली.
१६०० कोटींच्या वेव्हारांची चवकशी
ईडीन गोंयांत आतां मेरेन सगल्यांत व्हड छापो घालून, पिळर्ण, पर्वरी, दिवाडे अश्या जायत्या सुवातांचेर धाड घालून हणजूण, हडफडें, आसगांव वाठारांतलीं जमनींचीं बनावट कागदपत्रां तशेंच सुमार १६०० कोटींच्या स्थानाचेर मालमत्तांचीं कागदपत्रां जप्त केल्लीं. ह्या छाप्या वेळार पिळर्णच्या हरमलकार हांच्या घराकूय कुलूप मारिल्लें.
हणजूणां जमीन हडप प्रकरण
कॅनडा रावपी जॉयसे पिंटो हांच्या जाण्ट्यांचे जमनीचेर बनावट कागदपत्रां वरवीं कब्जो केल्ल्याची कागाळ तांचे वतीन आंतोनियो डिकॉस्टा हांणी एसआयटी कडेन दिल्ली. हणजूणच्या सर्व्हे नंबर ४४४/८ तली २,४५० चौ. मी. जमीन रोहन हरमलकार आनी हेर दुबावितांनी षडयंत्र रचून हडप केल्ल्याचो आरोप आसा. जाल्ल्या वेव्हारा प्रमाण, ही जमीन डिसोझा कुटुंबाच्या नांवाचेर करून २८ जानेवारी २०१९ दिसा हरियाणांतले आकाश आनी सीमा चौधरी हांका विकिल्ली.
दुसरी कागाळ बार्देसचे तेन्नाचे निबंधक अर्जुन शेट्ये हांणी म्हापशें पुलीस स्टेशनांत दिल्ली. हातूंत हणजूणची सर्व्हे नंबर ४२६/५ तली जमीन हडप केल्ल्याचें म्हणिल्लें. ह्या प्रकरणांत गुन्यांव दाखल केले उपरांत हें प्रकरण एसआयटी कडेन दिलें.
वयल्या दोनूय प्रकरणांत रोहन हरमलकार हांकां विवीध न्यायालयांनी सशर्त अटकपूर्व जामीन मंजूर केला. आतां ईडीन ताका अटक करून १४ दिसांची बंदखण दिल्या. तो एकलोच हें करतालो, काय ताचे फाटल्यान कोण राजकी व्यक्ती आसा, ताचो सोद चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
