भांगरभूंय | प्रतिनिधी
म्हापसा : कोणायकूय मरण कशें येत हें सांगू नज. केन्नाय अकस्मात अपघात जावन, जाल्यार केन्नाय हांसत-खेळतूय कोणाचोय जीव वता. म्हापश्यां अशीच एक घडणूक घडली.
हे घडणुके विशीं चड महायती प्रमाण,यल्लम्मा बसवराज लक्कुंदी (५३, रा. मोरजी पेडणे आनी मूळ कर्नाटक) ही बायल ३१ मेक दनपरां सुमार १२ वरांचेर गणेशपुरी-म्हापशेंच्यान आपल्या जावयां सयत दुचाकी फाटल्यान बसून वताली. ती मोरजेच्यान म्हापश्यां वताली. तांची दुचाकी गणेशपुरीच्या खेळां मैदाना कडेन पावली. तेन्ना मैदानाचेर कांय भुरगे फुटबॉल खेळटाले. तातुंतल्यान एकल्यान फुटबॉलाक कीक मारली आनी फुटबॉल वेगान रस्त्यार पावलो. नेमकीं त्याच वेळार यल्लम्मा आनी तिचो जावंय दोनचाकी वेल्यान थंय पावलीं. वेगान आयिल्लो फुटबॉल यल्लम्माचेर आदळ्ळो आनी तीं दुचाकीवेल्यान सकयल पडून जखमी जालीं.
यल्लमाक पयलीं जिल्लो हॉस्पिटलांत आनी उपरांत गोमेकॉत हालयली. थंय उपचार सुरू आसतना सोमारा, २ जुनाक यल्लम्माक मरण आयलें. म्हापशें पुलिसांनी ह्या अपघाताचो पंचनामो केलो. फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
