भांगरभूंय | प्रतिनिधी
मक्का, खबरां संस्था: सौदी अरेबियांत आयच्यान हज यात्रा सुरू जातली. आयतारा मेरेन १४ लाख नोंदणीकृत यात्रेकरू मक्का हांगा पावल्यात. जाल्यार लाखांनी लोक आजूनय येवपाचे आसात. ही यात्रा इस्लामीक कॅलेंडरच्या १२ व्या म्हयन्यांत (२०२५ वर्सा ४-९ जून) जिल-हिज्जाच्या ८ ते १२ तारखे मजगतीं आशिल्लें.
हज हें मुस्लिमांचें एक आध्यात्मीक आनी अनिवार्य धर्मीक कर्तव्य. शरिरीक, अर्थीक आनी मानसीक नदरेन सक्षम आनी निरोगी आशिल्ल्या दरेका मुस्लिमान जिणेंत एकदां तरी हज करप गरजेचें.
हज हो इस्लामाच्या पांच गरजेच्या स्तंभां मदलो एक. दर वर्सा संवसार भरच्यान सुमार २५ लाख मुस्लीम हे पवित्र यात्रेंत वांटेकार जातात. अंदूं भारतांतल्यान सुमार १.७५ लाख लोक मक्का पावतले.
हज मजगतीं, मुस्लिम काबा (बैतुल्लाह) ची प्रदक्षिणा घालतात आनी अल्लाहची प्रार्थना करपाक वेळ घालयतात. हज हो मुस्लिमां खातीर पापां पसून मुक्ती, आध्यात्मीक शुद्धीकरण आनी अल्लाहच्या लागीं वचपाची संद आसा.
परवानगे बगर हज करप्यांक ख्यास्त…
दंड: हज परवान्या बगर धरल्यार २०,००० रियाल (सुमार ५,००० वा ४.२ लाख रुपयां) मेरेन दंड.
धांवडायतले: परदेशी यात्रेकारांक दोशी थारले उपरांत धांवडावपाक शकता आनी तांकां १० वर्सां मेरेन सौदी अरेबियांत प्रवेश करपाक मेळचें ना.
हेर ख्यास्त: नेम मोडिल्ल्यान २३,००० परस चड सौदी नागरिकांक दंड आयकयलो आनी ४०० हज सेवा कंपनींचे परवाने रद्द केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
