भांगरभूंय | प्रतिनिधी
मिर्गा पयलींच्या पावसान सगल्याक हुंवार हाडलो. पावसान आपलें काम केलें. ताका दोश कसो दिवपाचो? हुंवार आयलो तो आमच्या कर्मान. आमी जें कितें रोयता तशेंच आमकां मेळटलें न्ही? तसो दर वर्सा पावस येता आनी आमकां जायतें कितें शिकोवन वता. पूण आमी ताचे पसून कसलो तरी धडो घेतात? ना! आमी आमचीं कर्मां करीत रावतात आनी दोश पावसाक वा सरकाराक दितात. निमाणें कितेंय घडलें म्हणजे सरकारान पळोवपाचें. आमचें कांयच कर्तव्य आसना. आमी सरकाराक वेंचून दिलां न्ही म्हणटकूच आमी घाण करपाची आनी सरकार ती उसपितलें म्हणपाची वाट पळोवपाची. सगलें निमाणें सरकाराच्या माथ्यार थापपाचें.
सद्याक पावस पडलो म्हणजे वचत थंय धोंपरभर उदक सांठुकूच जाय. उदक सांठचें ना जाल्यात कितें जातलें? खंयच्यान वतलें तें? वचूंक वाट आसूं नाका? खळयो आसात पूण तातूंत उदक वचूंक वाटूच ना. मागीर उदकान कितें करचें पडलें? जंय जागो मेळटा थंय रावचें पडलें ना? पयरच्या पावसान मडगांवचें गांधी मार्केट भरलें. लोकांच्या दुकानांनी उदक गेलें. दुकानदारांनी म्युनिसिपालटीच्या नांवान बोवाळ घालूंक सुरवात केली. उदकाक वाट करून दिली ना जाल्यार सोपो भरचे नात. पूण सभाग्यांनी विचारूच केलोना हें उदक सांठून उरूंक जापसालदार कोण? हांगच्या खळयांनी प्लास्टिकाचो कोयर कोण उडयता? आमी खूबदां पळयतात, कांय दुकानदार दुकानार जमिल्लो कोयर खळयांनी उडोवन ताका उजो लायतात. थोडो कोयर जळटा, थोडो उरता. हो उरिल्लो कोयर आनी जळिल्ल्या कोयराचो गोबोर तसोच खळयेंत उरता. पयल्या पावसाक तो व्हांवन वता आनी खंयतरी शिरकून उरता.
खळयो अश्यो तुमून उरतकूच उदक खंयच्यान वतलें? कोयर आमी करपाचो आनी पंचायत, म्युनिसिपालटीक खेपपाचें. आमचें हें सदचेंच जालां. आमीच जर सारके वागचे नात जाल्यार आनी कितें जातलें? कोयर आमीच करतात, तो मेळत थंय उडयतात. पंचायत वा म्युनिसिपालटीन कितलेय नितळसाण राखचेले येत्न करूं, आमी घाण करतलेच. आनी खळयो तुमतुकूच तांच्या नांवान बोवाळ घालतले. आमी घरा भोंवतणीं झाडां रोयतात. कांय सोबेचीं तर कांय फळां दिवपी. माड तर सगलेच लायतात. आनी पानां झडलीं, चुडटां पडलीं म्हणजे तीं हाडून रस्त्यार उडयतात. व्हरतली म्युनिसिपालटी. जशें कितें आमी झाडां रोवन म्युनिसिपालटीचेर उपकार करतात. आतां पावसा पयलीं लोक झाडांचे खांदे कापतात आनी तेय परत रस्त्यार. हें सगलें उदका वांगडा खळयेंत वचचें ना जाल्यार आनीक खंय वतलें? मागीर उदकान खंयच्यान वचप? खरें तर ह्या कोयराची बरेतरेन विल्हेवाट लावंक जाता. ह्या कोयराचो उपयोग करूं येता. जे कोण झाडां रोयतात तांच्यानी हो पालो भायर उडय नासतना झाडाक आळें करून ताच्या पोंदा घालीत तर हें बरें सारें झाडांक मेळटलें. पूण तें करपाची अक्कल आसूंक जाय न्ही?
‘शिकून ब्रूत’ अशें एक उतर आसा. म्हाका दिसता आमी सगले हांतलेच. आमकां आमचें घर निवळ जाय. देखून आमी घरांतलो कोयर हाडून रस्त्यार उडयतात. कोणूय अडाणी हें करता तर एकवेळ समजूं येता पूण शिकिल्ले सवरिल्ले स्वताक हाय क्लास समजुपीय हें करतात ताका कितें म्हणप? शिकून ब्रूत म्हणचे पडलें ना? आमच्या दवर्ले वाठारांत पळयात, वचत थंय कोयराच्यो राशी नदरेक येतल्यो. पंचायत बाबडी मदीं मदीं हे वाठार निवळ करता पूण ताचो उपयोग जायना. निवळ करता म्हणल्यार कोणतरी परत्योय कोयराच्यो पोतयो हाडून उडयता. आतां हें कोण करता कळना. कारण आमच्या पंचायतीन दर दिसा घरांतलो कोयर पुंजावन व्हरूंक मनीस दवरल्यात आनी दर दिसा दर वाड्यार वचून ते कोयर एकठांय करतात. इतलें आसुनूय हांगा कोयराच्यो राशी दिश्टी पडटात. पावस पडलो म्हणजे ह्या कोयराच्यो घाणी सगल्याक पसरतात. आतां दोश कोणाक दिवपाचो? पंचायतीक काय सरकाराक? पंचायत तर आपले परीन दवर्ली नितळ दवरचेलो येत्न करता. घराघरांनी वचून कोयर एकठांय करता आनी ताची योग्य तरेन विल्हेवाट लायता. तरी आसतना लोक जर घाण करतलेच तर कशें जावपाचें?
फक्त दवर्लेच न्ही तर सगल्याक हेंच चित्र दिसतलें. पंचायत वा म्युनिसिपालटी कितलीय नितळसाण दवरचेले येत्न करूं लोक घाण करतलेच. हायवेचेरूय तेंच. कितले तरी कामगार दर दिसा कोयर एकठांय करून पोतयांनी बांदून दवरतना दिसतात. खंयच्या येता हो कोयर? कोणतरी गाडयेकार घरांतल्यान ऑफिसाक वतना हेवटेन तेवटेन पळयत कोण आपणाक पळयना हे समजुतीन कोयराची पोती शेंवटून रस्त्या कुशीक उडयता. ताणें आपणालें घर नितळ केल्लें आसता. रस्त्याचें कोणाक पडलां? जायना थंय घाण, वचना तो कोयर खळयेंत ताका ताचें कांयच पडिल्लें आसना. आपूण दर दिसा ज्या रस्त्याचो येवंक वचूंक उपयोग करतां ताका इल्लो मान दिवचो इतलेंय कळना ह्या लोकांक. देवान हांकां अक्कल दिल्या फकत दुडू जोडपाची आनी व्हडल्यो व्हडल्यो गाडयो घेवन भोंवपाची. पूण रावप कशें, वागप कशें नितळसाण कशी दवरप हें चितपाची अक्कल दिवंक तो विसरलो आसूंक जाय.
लोकूच जर सुदारले नात तर दर वर्सा हुंवार चुकचोना. कोयर वचून खळयो तुमतल्यो आनी उदक रस्त्यार आनी घरांनी येतलेंच. सरकारी आस्थापनां आपले परीन काम करीत आसता पूण आमीच जावन हीं अरिश्टां हाडटात आनी उपरांत सरकाराक खेपप आसताच. आमी केल्लीं सगलींच कर्मां सरकाराच्या माथ्यार मारप सारकें? हाचेर विचार जावंक जाय न्ही.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
