भांगरभूंय | प्रतिनिधी
पणजी: चड मोबदलो दिवपाचें हांयस दाखोवन पेडणेंचे जमनींत तशेंच क्रिप्टो करन्सींत गुंतवणूक करपाक भाग पाडून 2.90 कोटी रुपयांची तोपी घाली. ह्या प्रकरणांत गोंय पुलिसांच्या अर्थीक गुन्यांव विभागान (ईओसी) बायो इस्टेट सोल्युशन प्रा. लि. कंपनी सयत संचालक गुलाबराव करंजुले, ताची घरकान्न अश्विनी गुलाबराव करंजुले, आनंद केवलरामानी, घनश्याम शर्मा, शकील खान आनी शिवाजी वाळके हांचे आड गुन्यांव दाखल केला.
ह्या प्रकरणांत सांतइस्तेवच्या वेनॉन डायस हांणी कागाळ दाखल केल्या. ते प्रमाण मुंबय आनी म्हापश्यां फांटो आशिल्ल्या बायो इस्टेट सोल्युशन प्रा. लि. कंपनीचे संचालक गुलाबराव करंजुले, ताची घरकान्न अश्विनी गुलाबराव करंजुले, आनंद केवलरामानी, घनश्याम शर्मा, शकील खान आनी शिवाजी वाळके हांणी कागाळदार आनी हेरांक कंपनीच्या चार विवीध येवजण्यांनी गुंतवणूक करपाक भाग पडले.
ते खातीर वयल्या दुबावितांनी कागाळदार आनी हेरांक कंपनीच्या तोरसे- पेडणेंचे जमनींत, कंपनीच्या निवृत्त वेतन येवजणेंत, बायोकोयन आनी हेर क्रिप्टो करंन्सींत गुंतवणूक करपाक भाग पाडले. ते प्रमाण वयल्या दुबावितांनी कागाळदार आनी हेरांची 2.90 कोटी रुपया फटवणूक केल्ल्याचें म्हणलां.
हाची दखल घेवन ईओसीचे अधिक्षक अर्शी आदील आनी उपअधिक्षक फ्रान्सीस कोर्त हांच्या मार्गदर्शना खाला निरिक्षक रमेश शिरोडकार हांणी वयल्या दुबावितां आड गुन्यांव दाखल केला.
ह्या प्रकरणांत ईओसीन वयल्या दुबावितां आड भारतीय दंड संहितेच्या कलम 406,409, 420 आनी 120 बी आनी गोंय ठेविदार कळंतर संरक्षण कायद्याचें कलम 3 आनी 5 खाला गुन्यांव दाखल करून तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
