भांगरभूंय | प्रतिनिधी
बेळगांवकारांचो म्हादयचें उदक घुंवडावपाक विरोध
पणजी: म्हादयचें उदक घुंवडावचें न्हय हे खातीर बेळगांवकार एकठांय अायल्यात. कणकुंबी, खानापूरचे कांय लोक लेगीत उदक घुंवडावपाक विरोध करतात. ह्या आंदोदलनाक नामनेचे पर्यावरणवादी रिधिमा पांडे हांणी तेंको दिला. आतां गोंयकारांनी लेगीत हे विशीं खर कृती करप गरजेची आसा अशें आवाहन राजन घाटे हांणी केलें. मंगळारा पणजेंत जाल्ले पत्रकार परिशदेंत ते उलयताले. ह्या वेळार शंकर पोळजी आनी हेर समाजीक कार्यकर्ते हाजीर आशिल्ले.
घाटे हांणी म्हणलें, कर्नाटकांत वीस परस चड व्हड न्हंयो आसात. अशें आसून लेगीत थंयचे लोक म्हादयचो प्रवाह वळोवचो न्हय हे खातीर आंदोलन करीत आसात. सुमार 46 टक्के गोंय उदका खातीर म्हादयचेर निंबून आसा. हांगा व्याघ्र प्रकल्प घोशीत जाल्यार न्यायालयांत गोंयची बाजू घटमूट जावंक शकता. पूण सरकार हातूंत कानार केंस काडिल्ले वरी करता. व्याघ्र प्रकल्पा विशीं जागृताय करपा खातीर आमी गांवांगांवांनी भोंवले. थंयच्या थळाव्यांक लेगीत तो जाय. पूण तांचेर राजकी चेपण आशिल्ल्याचें ते सांगतात अशें घाटे हांणी म्हणलें.
गोंय सरकार म्हादय विशीं गंभीर ना. हांगासरलो एक अधिकारी कर्नाटकाक म्हायती दीत आशिल्ल्याचो आमचो आरोप आसा. आमी विरोध केल्ल्यान त्या अधिकाऱ्याक आतां मुजतवाड दिली ना. ताचे सुवातेर आयिल्ल्या नव्या अधिकाऱ्यान म्हादय वाटावपा खातीर खर पावलां उबारप गरजेचीं आसात. म्हादय वळोवची न्हय हे खातीर कर्नाटक एक जाला. आतां आमी लेगीत आमचे मतभेद विसरून म्हादय वाटावपा खातीतर एकठांय येवंक जाय अशें मत घाटे हांणी ह्या वेळार उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
