आलमट्टी धरण : कर्नाटकाच्या हिता खातीर एकठांय येयात
भांगरभूंय | प्रतिनिधी
उपमुख्यमंत्री डी के शिवकुमार हांणी मारलो उलो
बंगळुरू, खबरां संस्था: कर्नाटकाचे उपमुख्यमंत्री आनी जलसंपदा मंत्री डी. के. शिवकुमार हांणी राज्यांतल्या केंद्रीय मंत्री आनी खासदारांक कर्नाटकाच्या हिता खातीर एकठांय येवपाचो उलो मारला. महाराष्ट्रान आलमट्टी धरणाची उंचाय वाडोवपाच्या प्रस्तावाचेर आक्षेप घेतले उपरांत तांणी ही भुमिका मांडली.
शिवकुमार हांणी ‘एक्सा’चेर पोस्ट करतना बरयलां, ‘आमकां शेजारच्या राज्यां कडेन संघर्श नाका, मात कायद्यान आनी न्यायान जें आमचें आसा, ताचे खातीर आमी ठाम रावतले. २०१० वर्सा कृष्णा न्यायाधिकरणान निर्णय दिलो तेन्ना महाराष्ट्रान कसलोच आक्षेप घेवंक नाशिल्लो. तांणी धरणांची उंचाय वाडोवची अशी मागणे करपी प्रतिज्ञापत्रूय सादर केल्लें. आतां अचकीत तांची भुमिका कित्याक बदल्ली?’
आलमट्टी धरण वाद: प्रकरण कितें?
आलमट्टी धरण (लाल बहादूर शास्त्री धरण) हें कृष्णा न्हंयेचेर एक व्हड सिंचन आनी जलविद्युत प्रकल्प आसा.
कर्नाटक सरकार धरणाची उंचाय ५१९ मिटरा वयल्यान ५२४.२ मिटरा मेरेन वाडोवपाक सोदता. हाका लागून १०० टीएमसीएफटी उदक साठोवपाची अतिरिक्त तांक निर्माण जातली. ६ लाख हॅक्टर नवी जमीन सिंचना खाला येतली.
महाराष्ट्राचो आक्षेप
महाराष्ट्राचे उपमुख्यमंत्री देवेंद्र फडणवीस हांणी ९ मेक पत्र बरोवन आक्षेप घेतलो. सांगली आनी कोल्हापूर जिल्ह्यांत हुंवार येवपाची शक्यताय तांणी उक्तायली. २०१० वर्सा मात महाराष्ट्रान उंचाय वाडोवपाक विरोध करूंक नाशिल्लो. प्रतिज्ञापत्रूय दिल्लें.
शिवकुमार हांची भुमिका
कायद्यान जें आपलें आसा, तें आमी मागतां.
हो राजकी मुद्दो न्हय, महाराष्ट्राचो आक्षेप शास्त्राधारीत ना.
कळावाक लागून प्रकल्प खर्च वाडटा.
जमीन अधिग्रहणा खातीर १ लाख कोटी लागतले.
सगल्या पक्षीय कर्नाटक खासदार आनी केंद्रीय मंत्र्यांनी एकठांय येवचें. केंद्रीय जलशक्ती मंत्री आनी प्रधानमंत्र्या कडेन गॅझेट अधिसुचवणी मंजुरी खातीर बेगीनूच भेट जातली. केंद्रीय मंत्री व्ही. सोमन्ना हांणी कर्नाटकाचे वटेन भुमिका घेवची अशी अपेक्षा आसा अशें शिवकुमार हांणी सांगलें.
मुखेल आडखळी
बागलकोट शाराचो कांय भाग उदका पोंदा वचपाची शक्यताय आसा. २०१३ सावन गॅझेट अधिसुचवण्यो मुखार धुकल्ल्यात.
कर्नाटक सरकार कायदेशीर हक्काच्या आधारार आलमट्टी धरणाची उंचाय वाडोवपाक सोदता. जाल्यार महाराष्ट्राक पर्यावरणीय आनी हुंवाराच्या धोक्याक घालून विरोध करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
