भांगरभूंय | प्रतिनिधी
सिडनी: ऑस्ट्रेलियांत रावपी 42 वर्सां पिरायेचो भारतीय वंशाचो गौरव कुंडी हाका पुलिसांनी अटक करपाचो यत्न करतना मानेचेर धोपर मारिल्ल्यान ताच्या मेंदवाक खर जखम जाल्ल्याचो आरोप आसा. सध्या तो कोमांत आसा. थळाव्या माध्यमांनी शेअर केल्ल्या हे घडणुकेचो व्हिडियो पळयल्यार गौरव कुंडी आनी ताची वांगडी अमृतपाल कौर आपूण निरपराधी आसात अशें बोवाळ करतात. कुंडीक जमनीर पाडले उपरांत एका अधिकाऱ्यान ताच्या मानेचेर धोपर मारले आनी ताची तकली पुलिसांच्या गाडयेक आपटली अशें कौरान सांगलें.
नेमकें कितें जालें?
पीडित भारतीय वंशाचो गौरव कुंडी (42), दोन भुरग्यांचो बापूय. अॅडलेडच्या उदेंत उपनगर, दक्षीण ऑस्ट्रेलिया हांगा रावता. ताका पुलिसांनी जमनीर उडयलो आनी मानेचेर धोपर दवरलें. देखून ताच्या मेंदवाक खर मार बसलो असो आरोप आसा. व्हिडियो पुराव्या प्रमाण “हांवें कांयच वायट करूंक ना” अशें गौरव म्हणटा. जाल्यार ताची वांगडी अमृतपाल कौर रेकॉर्डिंग करुन पुलिसांक ताचेर अन्याय करूं नाकात, अशी विनवणी करता. हे घडणुकेंत कुंडी बेशुद्ध जालो. ताच्या मेंदवाक रक्त पुरवण जावंक नाशिल्ल्यान सध्या तो कोमांत आसा. गौरवाचो मेंदू पुराय इबाडला अशें दोतोरांनी अमृतपाल कौराक सांगलें. ताका शुध्द येतली काय ना हें ताचो मेंदू कार्यक्षम उरता काय ना हाचेर आदारून आसा.
पुलीस कितें म्हणटात?
पुलिसांनी सांगलें, गौरव कुंडीन कागाळी प्रमाण अटक करपाक विरोध केलो म्हूण कारवाय केली. मानेचेर धोपर मारपाचो आरोप पुलिसांनी न्हयकारूंक ना, पूण आंतर विभागीय चवकशी सुरू आसा अशें सांगलां. अमृतपाल कौरान मात तांचेर अन्याय जाला आनी प्रतिकार जावंक ना अशें सांगून हो आरोप न्हयकारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
