भांगरभूंय | प्रतिनिधी
विश्वजीत राणेः उदरगती खातीर बेगिनूच कृती आराखडो
भांगरभूंय I प्रतिनिधी
पणजी : नगर विकास खात्या वरवीं वेवसायीक परवाने ऑनलायन दिवपाक सुरवात जाल्या. फुडल्या सप्तका पसून जल्म अानी मरणाचे दाखलेय ऑनलायन पद्दतीन दितले. पालिका क्षेत्रांच्या सर्वांगी उदरगती खातीर ठोस कृती आराखडो तयार करतले, अशी हमी नगर विकास खात्याचे मंत्री विश्वजीत राणे हांणी दिली.
नगर विकास सचीव रमेश वर्मा आनी संचालक गुरूदास पिळर्णकार हांचे सयत मंगळारा विवीध पालिकांच्या मुख्य कार्यकारी अधिकाऱ्यां वांगडा (सीईओ) जाल्ले बसके उपरांत ते पत्रकारां कडेन उलयताले. नगर विकास खात्या कडल्यान विवीध पालिकांक प्रकल्पां खातीर निधी दितात. ते वरवीं जायते प्रकल्प चालीक लागतात. पूण ताचे वरवीं सरकाराक फावोसो महसूल मेळना. ते खातीर फुडल्या काळांत प्रकल्पां खातीर पयशांचो याेग्य रितीन विनियोग करतले. प्रकल्पां खातीर पालिकांक निधी दितना सदर प्रकल्पांतल्यान कितलो महसूल मेळटलो हाचो नियाळ संबंदींत पालिकांक सरकाराक सादर करचो पडटलो, अशें मंत्री राणे हांणी म्हणलें.
पालिका क्षेत्रांत फक्त टायल्स, पेव्हर्स बसोवप इतलीच उदरगत, सोबितीकरणाक अर्थ ना. ताचेय मुखार वचून उदरगत करपा खातीर हाचे मुखार यत्न करतले. केंद्र सरकाराचो चडांत चड निधी गोंयांत हाडून त्या निधीचो वापर उदरगत, राेजगारा खातीर करतले. ते प्रमाण दर म्हयन्याक पालिकांचे सीईओ, नगराध्यक्ष हांचे कडेन बसका घेतले. विवीध येवजण्यो तशेंच उपक्रमां विशीं पालिका क्षेत्रांत जनजागृताय करपाचेर भर दितले, अशेंय मंत्री राणे हांणी सांगलें.
सगल्याच मतदारसंघांतल्यो समस्या सुटाव्यो करतले
विधानसभा अधिवेशनांत जायत्या आमदारांनी पालिका क्षेत्रांतल्या प्रलंबीत, अपुरे प्रकल्प, उदरगतीच्या कामां विशीं चर्चा केल्या. सगल्याच आमदारांच्या मतदारसंघांतल्या पालिकांचे प्रलंबीत प्रस्न आनी समस्या सोडोवपाचेर आपूण भर दितलो, अशें नगर विकास मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
