भांगरभूंय | प्रतिनिधी
कर्नाटक सरकारान केलें मास्क घालपाचें आवाहन
नवी दिल्ली, खबरां संस्था: देशांत कोरोना दुयेंतींचो आंकडो नेटान वाडत आसा. सध्या सक्रीय दुयेंतींचो आंकडो ३७२६ चेर पावला. केरळांत सगळ्यांत चड १३३६ दुयेंती आसात. महाराष्ट्रांत ७४९ जाल्यार दिल्लींत ३७५ सक्रीय दुयेंती आसात. फाटल्या २४ वरांत ७०० परस चड नवे दुयेंती सांपडल्यात.
कोरोनाक लागून मरण आयिल्ल्यांचो आंकडो २८ वयर पावला. फाटल्या २४ वरांत ६ जाणांक मरण आयलां. शेनवारा बंगळुरूंत पुराय लस घेतिल्ल्या ६३ वर्सां पिरायेच्या दादल्याक मरण आयलें. मजगतीं, दिल्लींत ६० वर्सां पिरायेच्या एका मनशाक मरण आयलां. महाराष्ट्रांत सगळ्यांत चड ७ जाणांक मरण आयलां.
कर्नाटक सरकारान शेनवारा भौशीक सल्लो जारी केलो. गर्देचे सुवातेर मास्क घालप, शारिरीक अंतर दवरप आनी नितळसाणेची खाशेली जतनाय घेवप अशें आवाहन केलें. जोर, खोंकली, छाती दुखप वा स्वास घेवपाक त्रास जाल्यार बेगोबेग चांचणी करपाकूय सांगलां.
मिझोरामाक शुक्रारा दोग जाण कोवीड १९ पॉझिटिव्ह आयिल्ल्याची म्हायती भलायकी खात्याच्या अधिकार्यांनी दिली. मिझोरामांत निमाणो कोवीड-१९ दुयेंती ऑक्टोबर २०२४ वर्सा सांपडिल्लो, ह्या काळांत राज्यांतल्या ७३ जाणांक कोरोना संसर्ग जाल्लो.
कोवीड प्रोटोकॉल पाळचो, नेमान हात धुवचे, हँड सॅनिटायझर वापरचे आनी गर्दीचे सुवातेर टाळचो असो सल्लो आयडीएसपीन दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
