भांगरभूंय | प्रतिनिधी
नवी दिल्ली, खबरां संस्था: ह्या नव्या म्हयन्यांत म्हळ्यार जून म्हयन्यांत जायते बदल जावपाचे आसात. आयज १९ किलो वेवसायीक एलपीजी सिलिंडराचें दर २४ रुपयांनी उणें जालां. आतां तो दिल्लीक १७२३.५० रुपयांनी मेळटलो. तशेंच सूर्योदय स्मॉल फायनान्स बँकेनय एफडीचेर व्याजदर उणो केला. आतां सामान्य नागरिकांक एफडीचेर ४% ते ८.४% व्याज मेळटलें. हाचे भायर ह्या म्हयन्या सावन कर्मचार्यांक एटीएम आनी यूपीआय कडल्यान सरळ पीएफ काडपाची सुविधा मेळटली.
जून म्हयन्यांत जावपी ६ बदल…
१. १९ किलो सिलिंडर सवाय: तेल कंपनींनी १९ किलो वेवसायीक एलपीजी सिलिंडराचें दर २४ रुपया उणें केलां.हाचे उपरांत देशाची राजधानी दिल्लींतल्या वेपारी एलपीजी सिलिंडराचें दर आतां १७२३.५० रुपया जालां. मात १४.२ किलो वजनाच्या घरगुती गॅस सिलिंडराच्या दरांत बदल जावंक ना. तो दिल्लींत ८५३ रुपया आनी मुंबय ८५२.५० रुपयांक मेळटा.
२. एफडी व्याजदरांत बदल: सूर्योदय स्मॉल फायनान्स बँकेन आपल्या एफडीचेर व्याजदर १ जून २०२५ सावन उणें केलां. आतां सामान्य नागरिकांक एफडीचेर ४% वयल्यान ८.४% व्याज मेळटलो. जाल्यार ज्येश्ठ नागरिकांक आतां एफडीचेर ४.४० टक्क्यां वयल्यान ८.८० टक्क्यां मेरेन व्याज मेळटलें.
३. म्युच्युअल फंडांत नवो कटऑफ वेळ सेबीन ओव्हरनायट म्युच्युअल फंड येवजणे खातीर नवीन कट-ऑफ वेळ सुरू केल्या. आतां ऑफलायन वेव्हारा खातीर दनपरां ३ वरांचेर आनी ऑनलायन वेव्हारा खातीर सांजवेळार ७ वरां मेरेन वेळ आसतलो. हाचे उपरांत दिल्ल्या ऑर्डरींचेर फुडल्या कामाच्या दिसा विचार जातलो. हाचो फायदो म्हणल्यार गुंतवणूकदारांक त्या दिसाचें निव्वळ मालमत्तेचें मोल (एनएव्ही) मेळोवपाक चड वेळ मेळटलो.
४. तुमी एटीएम आनी यूपीआय कडल्यान पीएफ पयशे काडूंक शकतात. केंद्रीय कर्मचारी भविष्य निधी संघटना (ईपीएफओ) फुडल्या म्हयन्यांत म्हळ्यार जूनांत व्हड बदल करपाची तयारी करता. प्रसार माध्यमांच्या खबरां प्रमाण ईपीएफओ ३.० च्या मसुद्या प्रमाण कर्मचार्यांक बेगीनूच एटीएम आनी यूपीआय कडल्यान सरळ पीएफ पयशे काडपाची सुविधा मेळूं येता. ईपीएफओ ३.० खाला पीएफ खातेंधारकांक पयशे काडपाचें कार्ड दितले. हें बँकेच्या एटीएम कार्डा सारकें आसतलें. नव्या सुविधे खाला फकत थारावीक रक्कम काडूं येता. हाका लागून कर्मचार्याक आणीबाणीच्या वेळार पयशे काडपाक मेळटले, पूण निवृत्ती उपरांत लेगीत खात्यांत फावो ते पयशे आसात हाचीय खात्री जातली.
५. आतां UPI वेव्हारांत खर्या प्राप्तकर्त्याचें नांव दिसतलें: एनपीसीआयन नवो नेम चालीक लायला जाचे खाला यूपीआय फारीकणी करतना वापरप्याक फकत निमाण्या लावार्थ्याचें म्हणल्यार खर्या गिरायकाचें बँकींग नांव दिसतलें. क्यूआर कोड वा संपादीत केल्लें नांव आतां दिसचें ना. सगळ्या यूपीआय ऍपांनी ३० जून मेरेन हे नेम चालीक लावचे पडटले.
६. विमान इंधनाचे किमतींत कपात: तेल विपणन कंपन्यांनी एव्हिएशन टर्बायन इंधनाचें (एटीएफ) दर उणें केलां. इंडियन ऑयलचे वेबसायटी प्रमाण, दिल्लींत एटीएफचें दर २४१४.२५ रुपयांनी उणें जावन तें ८३,०७२.५५ रुपया प्रती किलो लिटरांनी जाल्लें. दर उणें केल्ल्यान विमान प्रवास सवाय जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
