किशोरवयीन भुरग्यां मदीं धूम्रपान, ई-सिगरेटाचें व्यसन वाडटा

भांगरभूंय | प्रतिनिधी

तंबाखूक लागून दर वर्सा सुमार आठ लाख लोकांक मरण

नवी दिल्ली, खबरां संस्था ः तंबाखूक लागून दर वर्सा सुमार आठ लाख लोकांक मरण येता अशी धक्को दिवपी आंकडेवारी संवसारीक भलायकी संघटनेन जाहीर केल्या. तंबाखू सेवनाक लागून काळजाचे त्रास, वेगवेगळे दुयेंस, स्ट्रोक, कॅन्सर जातात. गोडेंमूत जावपाचोय धोको वाडटा.
संवसारभर दर वर्सा 31 मे दिसा संवसारिक तंबाखू विरोधी दीस मनयतात. तंबाखूच्या धोक्यांचेर जागृताय करप होच हो दीस मनयपाचो हेत आसा. तंबाखू सेवनाक लागून जावपी दुयेंस आनी मरणांचो वाडट्या आंकड्यांक लागून संवसारीक भलायकी संघटनेन १९८७ वर्सा संवसारीक तंबाखू विरोधी दीस सुरू केलो.
तंबाखू सेवन केल्यार तोंड, गळो, फुफ्फुस, पोट, मूत्रपिंड वा मुत्राशय हांचो कॅन्सर जावं शकता. तशेंच काळजाचे आनी रगतपेशींचे विकार, काळजाचे दुयेंस, काळजात दुखप, काळजाचो आताक लागून अचकीत मरण येवप, मेंदवाचे विकार, रगतपेशींचे दुयेंस अशें जायते दुयेंस जातात. तंबाखू हें क्षयरोगाचें अप्रत्यक्ष कारण. धूम्रपान वा तंबाखू सेवन केल्यार अचकीत रगतदाब वाडटा. तंबाखू रगतांतलें बरें कोलेस्टेरॉल उणें करता.
सिगरेट ओडपी लोकांक काळजाचो आताक आनी स्ट्रोक जावपाचो धोको दोन ते चार पटींनी चड आसता. सिगरेटांतलें निकोटीन टार रगतपेशीं अरुंद करतात. हाका लागून रगत घोळप इबाडूंक शकता आनी काळजाच्या दुयेंसांचो धोको वाडूंक शकता. धूम्रपान केल्यार उगडास उणी जाता. सिगरेटाच्या धुंवराक लागून तुमचे कातीचेर परिणाम जाता आनी गरजेचे पोशक तत्व मेळना. तशेंच मूत्रपिंडाच्या कॅन्सराचो धोको 50 टक्क्यां मेरेन वाडटा. मूत्रपिंड ल्हव ल्हव इबाडूंक लागतात.

तंबाखू, धूम्रपान पसून पयस रावात!
जेन्ना तुमकां धूम्रपान वा तंबाखू सोडपाची उमळशीक दिसता तेन्ना फुडाराचो विचार करात आनी तंबाखूच्यान जावपी भयानक दुयेंसांचो तुमचेर कितें परिणाम जातलो तें जाणून घेयात. जेन्ना तुमकां धूम्रपान वा तंबाखू सेवन करपाचे दिसता तेन्ना कितें तरी वेगळें करपाचो यत्न करात. दोन सिगरेट ओडपा खातीर कळाव करात, व्हडलो स्वास घेयात, उदक पियेवचें, सकारात्मक विचार करात, व्यायाम करात, योग करात, चलप, ध्यान, नाच, संगीत आदीं गजाली करात आनी पोशक आहार खायात.

मजगतीं, किशोरवयीन भुरग्यांमदीं धूम्रपान आनी ई-सिगरेट व्यसनाचें प्रमाण दिसानदीस वाडत आसा. किशोरवयीन भुरगीं ह्यो संवयी एक प्रवृत्ती म्हणून आपणायतात जी तांच्या भलायकेक खूब हानीकारक आसा. सगळ्यांत पयलीं पालकांनी स्वताक हें विशीं शिक्षण दिवपाची गरज आसा आनी तंबाखू सेवनाचो भलायकेचेर जावपी परिणामां विशीं भुरग्यां कडेन उक्तो संवाद करपाची गरज आसा. धूम्रपान आनी ई-सिगरेटाचें व्यसन फकत व्हडल्या लोकांमदीं न्हय तर किशोरांमदीं चड प्रमाणांत दिसून येवपाक लागलां.