भांगरभूंय | प्रतिनिधी
नवी दिल्ली, खबरां संस्था ः इंटरनेटाचेर 18.4 कोटी परस चड लोकांचे यूजरनेम आनी पासवर्ड लीक जाल्यात. सायबर सुरक्षा संशोधक जेरेमिया फावलर हांणी एका अहवालांत ही म्हायती दिली. जायते जाण पासवर्ड उगडाय उरपाक जाय म्हूण सोंपे पासवर्ड दवरतात. (देखीक नांव, जल्म तारीख, १२३४ अशें क्रमांक आदीं). जाका लागून हें पासवर्ड सोंपेपणान लीक जातात.
लाखांनी लोकांचे यूजरनेम आनी पासवर्ड आशिल्लो असुरक्षित डेटाबेस ऑनलायन मेळ्ळां. हे पासवर्ड ईमेल, सोशल मिडिया प्लॅटफॉर्म आनी बँक खात्यां कडेन जोडिल्ले आसात अशें फावलरान सांगलें.
चडसो लीक जाल्लो डेटा अॅपल, गूगल, फेसबूक, मायक्रोसॉफ्ट, इंस्टाग्राम, स्नॅपचॅट ह्या मुखेल प्लॅटफॉर्मां कडेन संबंदीत आशिल्लो. हाचे भायर अधिकृत URL, बँकींग, भलायकी आनी सरकारी पोर्टलांचे लॉगीन तपशीलय तातूंत आशिल्ले. डेटा लीक जाल्ल्यान कोटी वापरप्यांची वैयक्तीक म्हायती धोक्यांत आसा. ह्या अहवाला उपरांत जायत्यो कंपनी सतर्क जाल्यात.
पासवर्ड कशे लीक जाले?
फावलराच्या मतान हो डेटा ‘इन्फोस्टीलर’ नांवाच्या मालवेयरान चोरलो आसूं येता, जो संगणकाचेर सांठयल्लो डेटा काडटा. इन्फो-स्टीलर मालवेयर वापरप्यांच्या ब्राउझरां वयल्यान सेव्ह केल्ले पासवर्ड, ऑटोफिल म्हायती आनी कुकीज चोरता. वापरप्यान चुकून भोगस लिंकाचेर क्लिक केल्यार वा ईमेलांतल्यान फायल डावनलोड केल्यार हो व्हायरस स्टिटमांत प्रवेश करता. उपरांत ईमेल, बँक, आनी सोशल मिडिया खात्यां संबंदीत म्हायती लीक करता. सायबर गुन्यांवकार चड करून मालवेयर वापरतात जो वेबसायट आनी स्टिटमांतल्यान, यूजरनेम, पासवर्ड, आनी क्रेडीट कार्ड क्रमांक अशी म्हायती चोरतात आनी डार्क वेबाचेर विकतात.
हॅकर्साच्या वळेरेंतले कांय कॉमन पासवर्ड
123456, 123456789, Qwerty, Qwerty123, Password, 111111, 123123, 666666, ILoveyou, Qwertyuiop, 123321, 654321, Abc123, 09876, DEFAULT, 1q2w3e.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
