भांगरभूंय | प्रतिनिधी
पणजी: पक्षी मोग्यांच्या यत्नांक लागून गोंयांत पयलेच फावटी पक्षांच्या आठ नव्या प्रजातींची नोंद जाल्या. हातूंत ‘शॉर्ट टेल्ड शीअर वॉटर’, ‘व्हायट टेल्ड ट्रॉपीक बर्ड’, ‘लेसर नॉडी’, ‘ग्रेट फ्रिगेट बर्ड’, ‘स्ट्रिकड शीअर वॉटर’, ‘येलो रम्पड फ्लायकॅचर’, ‘आफ्रिकन ओपनबील’ आनी ‘जेर्डन बुश क्लार्क’ ह्या पक्षांचो आस्पाव आसा. ह्या नव्या नोंदीक लागून गोंयांत सांपडटल्या पक्षांची संख्या वाडून 497 जाल्या. हाका लागून भारतीय उपखंडांत सांपडपी वट्ट पक्षां पैकीं आतां मेरेन सुमार 40 टक्के पक्षी गोंयांत सांपडिल्ल्याची म्हायती गोवा बर्ड कॉन्सर्वेशन नेटवकार्च (जीबीसीएन) डॉ. प्रणय बैद्य हांणी दिली.
डॉ. बैद्य हांणी सांगलें, नव्यान सांपडिल्ल्या आठ पैकीं पांच पक्षी दर्यांतले आसात. ‘शॉट टेव्ड शीअर वॉटर’, ‘व्हायट टेल्ड ट्रॉपीक बर्ड’ हे पक्षी मरीन स्टँडिंग नेटवर्क च्या वांगड्यांक नदरेक पडिल्ले. ‘लेसर नॉडी’ पक्षाची नोंद सागर नायक आनी शुभम राणे हांणी केली. ‘स्ट्रिकड शीअर वॉटर’ पक्षाची नोंद हांवें आनी जल्मेश कारापुरकार हांणी केली. ‘जेर्डन बुश क्लार्क’ पक्षी ओमकार दामले हांकां दिशिल्लो. दुर्मीळ ‘येलो रम्प्ड रम्पड फ्लायकॅचर’ ची नोंद कुलदीप तोपो आनी पराग रांगणेकार हांणी केली जाल्यार ‘आफ्रिकन ओपनबील’ ची नोंद अपर्णा लाड हांणी केल्ली.
जबिसीएन, गोंयांतले पक्षी निरिक्षण करपी हेर तत्सम संस्थांक लागून तशेंच छंद म्हणून पक्षी निरिक्षण करपी हौशी पक्षी मोगींक लागून गोंयांत नव्या प्रजातीचे पक्षी सोदपाक मजत जायत आसा. हाका लागून गोंयांत सांपडटल्या पक्षांचे वळेरेंत भर पडत आसा. शास्त्रोक्त पद्दतीन तयार करतात ती वळेरी ‘गोवा बर्ड चेकलिस्ट’ नांवान वळखतात. अंदूंची वळेरी डॉ. बैद्य आनी मंदार भगत हांणी तयार केल्या. 2018 वर्सा गोंयांत जाल्ल्या पक्षी महोत्सवा पसून ही वळेरी तयार करतात. हातूंत दर वर्सा नव्यान सांपडिल्ल्या पक्षांची नोंद करतात.
गोंयांत सांपडपी पक्षांच्या प्रजातीची संख्या रोखडीच 500 मेरेन पावतली अशी आस्त आसा. देशांत सांपडपी वट्ट पक्षां पैकीं 40 टक्के पक्षी गोंयांत सांपडटात. हाचे वेल्यान गोंयांतली सैमीक समृद्धी समजून येता. गोंयांतल्या पक्षांची ही विविधताय कायम राखप गरजेचें आसा. गोंय सरकार, संशोधन संस्था, पक्षी मोगी हांच्या सहकार्याक लागून पक्षां खातीर हांगासरली जैव विविधताय हॉट स्पॉट राखप शक्य जाल्ल्याचें डॉ. बैद्य हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
